Kudutshulwe isikhulu sePirates sibanjwa inkunzi

Siyelulama esibhedlela isikhulu se-Orlando Pirates, uStanley “Screamer” Tshabalala, kulandela ukudutshulwa ngoLwesithathu emzini waso.

Lezi zindaba ziqhamuke noThandi Merafe okhulumela iPirates, esitatimendeni asithumelele abezindaba ngoLwesine ntambama.

Nokho kuphele imizuzu embalwa uThandi wasicisha lesi sitatimende, kwangaqondakala ukuthi kanti ubesithumele ngephutha yini.

Isitatimende besifundeka kanje: “Owayengumqeqeshi weBafana Bafana, uStanley “Screamer” Tshabalala, uyelulama esibhedlela.

“Udutshulwe izolo (ngoLwesithathu) ngesikhathi kugqekezwa emzini wakwaTshabalala.

“Bekusemini ngemuva kancane kwezikhathi zamadina. Udaba selusezandleni zeSouth African Police Services (SAPS) manje.

“Umndeni wakwaTshabalala uyabonga kakhulu ngemilayezo namazwi okuwududuza kulesi sikhathi.

“Ucela ukunikwa isikhathi sokwenza izinto ngasese njengoba uBra Stan ezama ukululama.”

Isitatimende bekubhalwe ekugcineni ukuthi sithunyelwe okhulumela umndeni wakwaTshabalala, uThato Matuka.

UScreamer Tshabalala wake wadlalela iKaizer Chiefs ngesikhathi isanda kuba khona, futhi ungomunye wezinkakha zayo ezihlonishwayo.

Uke waqeqesha nasemaqenjini ehlukene okubalwa kuwo iMamelodi Sundowns neMoroka Swallows.