Kusolwa ukuziphindisela ngokubulawa kukaZolani Tete
SIHLE NGUBO
Kusolakala izindaba zokujola nobufebe ekufeni komshayisibhakela odumile, uZolani “Last Born” Tete, odutshulwe ngoLwesihlanu olwedlule.
UTete, owayengumpetha weWBF Flyweight neWBO Bantamweight, udutshulwe abantu abangaziwa ngoLwesihlanu ngabo-6.30 ntambama.
Kubikwa ukuthi uTete ubefika ezama ukuvula isango ngesikhathi ehlaselwa ngenganono, kanti ubehamba nowesifazane oneminyaka engu-27 okukholakala ukuthi yintombi yakhe.
Umsolwa, okukholakala ukuthi uyena ungqondongqondo ekufeni kukaTete, uvelile enkantolo ngoMsombuluko, kanti igama lakhe uZuzole Goqwana oneminyaka engu-22.
Abanye abasolwa abathathu bazovela ngoLwesibili enkantolo ehlukile kunale okuvele kuyona uGoqwana.
Ngokuthola kweMpempe, uGoqwana wayethandana nonkosikazi kaTete nokukholakala ukuthi yikona okwenza ukuthi bahlukanise.
“Lo mbhemu uyena owahlakaza umshado kaTete nomkakhe. Wayejola nomfazi kaTete, wagcina ekutholile lokho uZolani,” kusho umthombo weMpempe.
“Ngemuva kwalokho uGoqwana wadutshulwa abantu abangaziwa kanti yena ukholwa ukuthi babethunywe uTete.
“Njengoba umbona esesihlalweni esinamasondo uGoqwana, ubenenhliziyo embi yokuthi walinyazwa abantu ababethunywe uTete.”
Indlela okuvela ngayo kubukeka sengathi bekhona ukuziphindisela ekubulaweni kukaTete.
UGoqwana unqatshelwe ibheyili ngoMsombuluko ngoba kusatshelwa ukuphepha kwakhe.
Owesimame oneminyaka engu-27, obesemotweni noTete, nokukholakala ukuthi yintombi yakhe, uselashwa esibhedlela njengoba naye adubuleka ngosuku lwesigameko.
UTete, obeneminyaka engu-38, ubehlela ukubuyela eringini maduze kulandela ukumiswa iminyaka emine ngenxa yokutholakala enezidakamizwa ezingadingeki emzimbeni wakhe.
Lesi sigwebo sakhe bese siphelile futhi ubesafuna ukushaya isibhakela okuyinto abeyeyiphilela.
