ILudonga Boxing iyokhulisa isibhakela eKhulisa Village, eMtuba
By Alfred Ngubane
UZwilenkosi Magudulela, ongumhleli wezimpi ngaphansi kweLudonga Boxing Promotion uthi uzohambisa ezinye izimpi zabo eMtubatuba.
Uthi inhloso yabo ngalokhu wukufukula amabhokisa aseMtubatuba athi ukholwa anekhono elihle elingagcina likude uma linikwa amthuba.
“Ngikholwa ukuthi iKhula Village likhaya loshampeni bomhlaba,” kusho uZwi Magudulela.
“Kuzomele ngihambise izimpi zamabhokisa akhona adlale phambi kwabazali, izihlobo nabangani neNkosi uMkhwanazi nezinduna.”
Lamabhokisa akhuluma ngawo uZwi afike emancane eLudonga Boxing Promotion kanti kuwo singabala o-Innocent “Tycoon” Mantengu noSboniso “Tiger” Gonya.
Bafika bagila izimanga njengoba benqobe amabhande amakhulu emhlabeni. UGonya unqobe eleWBA ekuhambeni eNamibia waphinda walwela ibhande lomhlaba kwiWBO.
Nokho wageja kulo njengoba ehlulwe nguZolani Tete empini eyaba se-England. UMantengu unqobe ibhande lakuleli kanti njemanje ungumphetha weWBF International.
Waphinda wadlala nakwiPBL Championships lapho ayebhekene amehlo namehlo noLamati, Xolisani Ndongeni, Mabhuti Senyabi noThabo Sonjica.
Njengamanje iKhula Village izele umpetha omusha uSabelo “Mkhonto” Cebekhulu ophethe ibhande leWBF International.
UNcebo Sibiya naye okulesi sitebela esasungulwa nguThulani Magudulela ongasekho, ubheke ebhandeni lomhlaba ngokusho kukaZwi Magudulela.
“Ngifuna ukusho ukuthi iLudonga Boxing Promotion inikeza amabhokisa asezindaweni zasemakhaya amathuba njengoba siqhatha KwaNongoma, Ophongolo nasoLundi.
“NaseBaqulusini sesike saqatha khona njengoba sakhipha uNkosinathi Biyela, Xolani Mvubu, noThalente Zulu…
FUNDA NALA: Ugqilaze abalandeli beSundowns uPercy Tau eweza i-Al Ahly
“Namanje sisazobakhipha ompetha lapho kunganakiwe khona,” kuchaza yena.
UZwi Magudulela uphinde wanxusa osomabhizinisi ukuthi baphonse esibhakeleni njengoba sishoda nje ngabaxhasi.
