Ucacisa ngekusasa lakhe esibhakeleni uThabiso Mchunu
ALFRED NGUBANE
UThabiso “The Rock” Mchunu usephumele obala ngekusasa lakhe esibhakeleni kulandela ukuhlulwa kwakhe empini yakamuva.
Kube nezinkulumo kubalandeli bezamankomane zokuthi mhlawumbe sekumele ayidede inkundla umfokaMchunu.
Lokhu bekungenxa yokuthi abachazekanga ngendlela alwe ngayo ehlulwa uYamila Alberto Peralta wase-Argentina empini yokuhlungela ibhande le-Silver WBC muva nje.
Wahlulwa ngamaphuzu kule mpi obekubhekwe ukuthi azethule kabusha ngayo esibhakeleni somhlaba ngemuva kokunyamalala isikhashana.
UMchunu ekhuluma neMpempe, uthe abalandeli bakhe mabehlise umoya. usazoyibamba kule ndima yezamankomane.
“Ngangizihlelele ukuthi uma ngabe sengineminyaka engu-36 ngoba sengiqala ngicabanga ngekusasa lami nesibhakela.
“Kodwa ngingathokoza ukuhlala noma iminyaka emine kusukela manje,” kusho umfo kaMaingwane.
Khonamanjalo, kungenzeka ukuthi uMchunu asheshe athole enye impi njengoba kukhona abahleli bezimpi KwaZulu-Natal naseGauteng abamfuna ukumqatha.
FUNDA NALA: UNcube uphalaza iqiniso ngesihluku asifica kuMaZulu
UMchunu kumanje ubuyele ejimini wayohlala khona ngoba efuna ukuzicija kahle ngaphandle kwengcindezi.
