UShalulile ubuye ngegoli iDowns ishaya iChilli Boys
Ubuye ngegoli uPeter Shalulile ngesikhathi iMamelodi Sundowns ishaya iChippa Unietd ngo 2-1 emdlalweni weDStv Premiership, eLoftus Stadium, ngoLwesibili.
UShalulile bese kuphele isikhathi eside engadlali ngoba kuthiwa ulimele, kanti ushaye igoli lakhe lesikhombisa ngoLwesibili. Ukuwina kweSundowns kwenze yavula igebe laba amaphuzu angu-13 esicongweni, kanti endaweni yesibili kukhona iSuperSport United.
IChippa ayikaze iyishaye iSundowns emidlalweni yeligi selokhu yafika esigabeni esikhokhelayo. Ukushaywa kweChilli Boyz kuchaza ukuthi izohlala endaweni yesishiyagalolunye kwilogi yePremiership.
Ngaphambi komdlalo wangoLwesibili umqeqeshi weChippa, uMorgan Mammila, uthe bazodlala njengayo iSundowns ukuze bazame ukuthola iwini. Nokho kubukeka kungasebenzanga konke lokho njengoba Abafana Ba’style beqhubekile nokuqoqa amaphuzu yize behlulekile ukugwema ukungenelwa yigoli.
ISundowns izihambela yodwa futhi kubukeka sengathi izophinde yephule amarekhodi nakulokhu. Ngesizini edlule iwine isicoco seligi ivule igebe lamaphuzu angu-16 wonke esicongweni. Njengoba kusasele imidlalo engu-14 ukuthi kusongwe isizini kubukeka kungekho okuzovimba iSundowns ukuthi yephule amarekhodi nokuthi ihambe naso isicoco seligi.
Igoli lokuqala leSundowns lishaywe uTeboho Mokoena ngomzuzu ka-14 kwathi elesibili leza noShalulile ngoka-67. Kuke kwabukeka sengathi iChippa izoshaya igoli lokubika ekhaya ngasemizuzwini yokugcina kodwa yala yaphetha iSundowns emuva ngomzuzu ka-77. Nokho iChippa igcine ilishayile elokubika rkugcineni nelize noLeditso ngomzuzu ka-91.
ISundowns seyiwine imidlalo yeligi eyisishiyaglombili ilandelana kanti seyishaya amagoli angu-18 yadedela elilodwa. Yonke le midlalo iyiwine ngamagoli amabili kuya phezulu.
Sdina Ngubo
