Iyobanjwa esithele nayo kwiBayern Munich neBorrussia Dortmund eGermany

Njabulo Shezi

Zisazonikizana kwiBundesliga yase-Germany njengoba ushubile umbango wesicoco seligi phakathi kweBorussia Dortmund neBayern Munich.

IBorrusia Dortmund yiyo ezihola phambili kule ligi ngamaphuzu angu-60. 

Ezithendeni zayo kukhona iBayern Munich elele isibili ngamaphuzu angu-59. Sekusele imidlalo emihlanu isongwe isizini. 

Kuzogqashuka izintambo zekhokho uma iBorrusia Dortmund isigadulisana neBochum ngoLwesihlanu kusihlwa. 

IBochum izobe ilwela ukusida ezembeni kodwa ngathi izowuthwala uthayela emoyeni kulo mdlalo njengoba izimbangi zona sezibheke isicoco. 

Leli qembu eliphekwa nguThomas Letsch lihleli endaweni ka-15 njengoba lisaqoqe amaphuzu angu-27 nje kuphela. 

IBorrusia izobe ilwela ukungaqhuzuki ngoba ingazithola seyilandela ngemuva kwiBayern Munich uma ibhayizile. 

IBayern Munich, ecijwa nguThomas Tuchel yona izobhekana neHertha Berlin esemsileni njengoba inamaphuzu angu-22.

Kanti kolunye uhlangothi iBayer Leverkusen ehleli endaweni yesithupha ngo-47 ibheke ukubuyela kwiChampions League. 

FUNDA NALA: Kubuya abebelimele kwi-Orlando Pirates, akucaci ngoLorch 

Izobe ibheke ukuvala igebe eliphakathi kwayo ne-Union Berlin elele isithathu uma lamaqembu esegadulisana ngoMgqibelo.

Imidlalo yeBundesliga kule mpelasonto:

NgoLwesihlanu: Bochum v Borussia Dortmund.

NgoMgqibelo: Union Berlin v Bayer Leverkusen; FC Cologne v Freiburg; Frankfurt v Augsburg; Stuttgart v Monchengladbach; Leipzig v Hoffenheim; Schalke v Werder

NgeSonto: Wolfsburg v Mainz; Bayern v Hertha