Kubuya abebelimele kwi-Orlando Pirates, akucaci ngoLorch
By Sbongs Gumbi
Isihlabani esingaconsi kubalandeli be-Orlando Pirates, uThembinkosi Lorch kungenzeka aphinde engabonakali emdlalweni olandelayo.
ULorch ubengekho ngempelasonto edlule ngesikhathi iBucs ishaya iCape Town City ngo 2-1 emdlalweni weDStv Premiership.
Umqeqeshi we-Orlando Pirates, uJose Riveiro akazange aphumele obala ngokuthi yini emvimbile, wathi uthinteke ejimini.
Kodwa leli qembu laseSoweto seliyikhiphile imininingwane ngabalimele, yaveza yokuthi kwenzekeni ngoLorch.
Selokhu ebuyile uLorch ekulimaleni isikhathi eside, ubedlala kahle kwiPirates futhi ubewenza umehluko.
Isitatimende esikhishwe yi-Orlando Pirates ngoLwesihlanu ekuseni sithi uLorch walimala okhalweni ejimini.
“UThembinkosi Lorch noTapelo Xoki bebengekho emdlalweni wethu weligi esaqunqoba ngo 2-1 sibhekene neCape Town City ngempelasonto.
“Lesi sitobha besiselashwa kulandela ukulimala esikhathini esengeziwe emdlalweni weNedbank Cup neDondol Stars ePolokwane.
“Umdlali wasesiswini yena (uLorch) akadlalanga kodlule ngenxa yokuthinteka okuncane akuthola kulungiselelwa lo mdlalo obuse-Olando Stadium.
“Ngokwethimba lodokotela, uXoki uzobe eseklungele ukudlala ngeSonto uma sesibhekene neTS Galaxy ekuhambeni.
“Ubuyele ejimini ngokugcwele njengoba eseluleme ekulimaleni ekhanda abenakho.
“ULorch yena kuzanokungabaza ngaye ukuthi engawuqala lo mdlalo oseMbombela futhi usaqashiwe ngodokotela,” kusho iBucs esitatimendeni.
I-Orlando Pirates iphinde yaveza ukuthi uBandile Shandu, obegula noCraig Martin, obelimele, sebebuyele ejimini.
“Abadlali basemuva ohlangothini lwesikudla oBandile Shandu noCraig Martin sebebuyele eqenjini ngemuva kokwelulama. Bobabili sebejima ngokugcwele.”
Nonozinti obesehlale ngaphandle isikhathi eside, uRichard Ofori useluleme ngokunjalo nomgadli u-Eva Nga.
“Khonamanjalo, uVincent Pule nomgadli uNdumiso Mabena kulindeleke babuyele ejimini ngeviki elizayo kulandela ukuma ngenxa yokulimala.
FUNDA NALA: UTruter wexwayisa uManqoba Mngqithi ngokuya kuMaZulu
“Nomdlali wasesiswini uGoodman Mosele useqalile ukujima yize esaqashiwe ukuthi welulama kahle yini.
“Isitobha u-Olisa Ndah yena akakezujima neqembu njengoba esanesa ukulimala edolweni,” kusho i-Orlando Pirates.
