U-Ofori ukwabaphelelwa yizinkontileka kwiBucs

Inkontileka kanozinti we-Orlando Pirates, uRichard Ofori, izophela ekupheleni kwesizini, kanti kumanje ikusasa lakhe kuleli qembu liyangabazeka. 

Yize engumdlali omqoka eqenjini lesizwe laseGhana, u-Ofori uzithole engasenandawo kwiPirates. 

Lokhu kulandela ukuthi uSipho Chaine kunguye osedle ijezi likanozinti oqala imidlalo, bese uMelusi Buthelezi abe sebhentshini eqenjini lilaJose Riveiro. 

Kule sizini, u-Ofori akakadlali emidlalweni ye-PSL kanti udlale kwemithathu kwiCaf Champions League. 

Nokho, phezu kokungasitholi isikhathi sokudlala ezingeni leqembu, usalokhu engunozinti othandwayo kwiBlack Stars. 

Uyidlale yomithathu imidlalo yaleli qembu kwiCaf Africa Cup on Nations e-Ivory Coast ngoJanuwari. 

Kubukeka sengathi iBhakabhaka belingakakhulumi no-Ofori mayelana nokuvuselela inkontileka yakhe njengoba sekusele izinyanga ezimbili ukuthi iphele.

Ngaphezu kwalokho, kunamakilabhu amabili angaphandle kwaseNingizimu Afrika asekhombise intshisekelo ngalo nozinti oneminyaka engu-30. 

U-Ofori, odabuka e-Accra, eGhana, usevumelekile ukuthi angasayina inkontileka yesethembiso nelinye iqembu. 

Kusukela ejoyine i-Orlando Pirates ekuqaleni kwesizini ka-2020/21 esuka kwiMaritzburg United, u-Ofori usedlale imidlalo engu-58 kuyona yonke imiqhudelwano. 

Ungenelwe amagoli angu-36 kanti akangenelwanga goli emidlalweni engu-30. 

Usenezindebe ezine okubalwa kuzo eyeNedbank Cup nezithathu zeMTN8 kwiPirates.

Okumele kuqapheleke ukuthi ngaphandle kuka-Ofori, izinkontileka zikaThabang Monare, Kermit Erasmus, Makhehlene Makhaula, noSiyabonga Mpontshane nazo zizophela ngoJuni.

UMonare usanda kusayina inkontileka yonyaka owodwa ngoJulayi odlule, kanti leli qembu linethuba lokwelula inkontileka yakhe.

FUNDA NALA: OwoSuthu ucacisa ekaHanamub okhonjwa kwiBucs

Kuvela ukuthi noMakhaula uzovuselelwa eyakhe uma iphela kanti uMpontshane engase ashiye yena.