U-Arthur Zwane akafuni ukushintsha kakhulu koweSwallows
Umqeqeshi weKaizer Chiefs u-Arthur Zwane uthi uzoqhubeka neqembu ashaye ngalo iChippa United uma sebebhekene neSwallows FC ngoMsombuluko ntambama.
Nokho uzophoqeleka ukwenza ushintsho olulodwa futhi uqinisekisile ukuthi uzobuyisela u-Itumeleng Khune ezintini kulo mdlalo osePeter Mokaba Stadium ePolokwane.
U-Arthur Zwane njengoba uBrandon Petersen engeke nje awudlale lo mdlao ngenxa yokumiswa, uzobuyisa uKhune.
“Ngokwamalundiselelo, sibe nosuku olulodwa ukucabanga ngeSwallows,” kusho lo mqeqeshi.
“Sizodlaa ngendlela esidlale ngayo kowedlule. Sizofaka u-Itu futhi sizozama ukuthi sigcine iqembu elifanayo – leli elidlale neChippa ngoba asibanga nesikhathi esanele sokuzilungiselela.
“Sinemidlalo elandelana eduze kant i uma ukuleso simo awukwazi ukwenza izinguquko eziningi ngaphandle uma kuphoqa isimo.”
ISwallows isendaweni ebucayi futhi ayikaphumi egibeni wezembe futhi yingakho u-Arthur Zwane ebona izobanika inkinga kulo mdlalo wangoMsombuluko.
“Ukudlala namaqembu abhekene nezembe akulula. Emdlalweni wethu neChippa besithwele kanzima ngoba beyizimisele kakhulu.
“Kudingeke siwulwele umphumela futhi yilokho osekumele sikwenze kuyo yonke imidlalo ezayo ukuze sithole amaphuzu aphelele.
“Sekusele imidlalo embalwa ngakho akusamele sidedele amaphuzu ngoba sifuna ukuqeda endaweni enhle.
“ISwallows iyiqembu elihle, akungabazeki lokho. Ukuthi nje imiphumela beyiyiphika.
“Kodwa ke lokho akusho ukuthi ngeke ilwe uma seyibhekene nathi – izolwa. Nathi kuzomele sizibambe ziqine uma sifuna amaphuzu agcwele kulo mdlalo.”
IChiefs isasembanweni wokuqeda endaweni yesibili kanti isalele emuva ngamaphuzu amahlanu kwi-Orlando Pirates esendaweni yesibili.
FUNDA NALA: Useyitholile incwadi yokumbopha uPhumlani Dube ‘ohlambalaze’ AmaZulu
ISuperSport United yona isendaweni yesithathu kanti inamaphuzu angu-47, ishiya iChiefs ngamane.
ISwallows yona isendaweni ka-13, kodwa iqhele ngamaphuzu amahlanu kuphela ezindaweni zezembe njengoba sekusele imidlalo emithathu nje.
By Sbongs Gumbi
