Izohlehlelwa yiNelson Mandela Bay iChippa uma kukhala izembe
By Sihle Ngubo
Kubhekwe isinqumo sikamasipala waseNelson Mandela Bay ukuthi uyayivuselela yini inkontileka onayo neChippa United, ezinze e-Eastern Cape negijima kwiDStv Premiership.
Lesi sivumelwano, phakathi kweChilli Boys nomasipala waseNelson Mandela Bay sizofinyelela emaphethelweni ngokuphela kwesizini, ngokombiko we-Inksport.
Lokhu kuqinisekiswe yilungu lekomiti laseNelson Mandela Bay (kumasipala) kwezemidlalo, ukuhlumelelisa, ubuciko nezamasiko, uMcebisi ‘Bassie’ Kamana.
UKemana wengeze ngokuthi umkhandlu usazobhunga ukuthi uyayivuselela yini inkontileka noma cha.
IChilli Boys nomasipala basayina inkontileka yeminyaka emithathu ngo-2020, lapho leli qembu elizinze eGqeberha belithola uxhaso luka-R6 million ngonyaka.
Belithola no-R7 million kanti belinikwa u-R500 000 ngonyaka ukuzimaketha.
“Isivumelwano sethu seminyaka emithathu neChippa United sizofinyelela emaphethelweni ekupheleni kwesizini.
“Sizocubungula konke kahle ngaphambi kwesabelo-mali sethu esiqala ngoJulayi. Yilokho kuphela engingakusho okwamanje,” kusho uKamana owayengumshayisibhakela.
Ubudlelwane beNelson Mandela Bay neChippa buke baba nezinselelo kodwa zabuye zalungiseka.
Enye yazo kwaba wukudaza inkani kukaSiviwe Mpengesi, umnikazi weqembu, ngesikhathi eqasha uLuc Eymael ukuba azoqeqesha.
Lo masipala washaya phansi ngonyawo wathi ngeke usasebenzisana naleli qembu kwazise lo mqeqeshi wayebhekene nezinsolo zokucwasa ngebala.
Lokhu kwakulandela ukuxoshwa kwakhe eqenjini laseTanzania iYoung Africans kulandela ukungathekisa abalandeli balo nezimfene.
FUNDA NALA: U-Ace Ncobo ucacisa ngophawu ‘lweBucs’ nephenathi yeChiefs
Njengamanje iChilli Boys ilwela ukuvika izembe njengoba iyibambe endaweni ka-15 ngamaphuzu angu-29. Basalelwe yimidlalo emibili kuphela ngaphambi kokuthi kusongwe isizini.
Bazobhekana neTS Galaxy eMbombela Stadium, ngoMgqibelo, bese bayivale neLamontville Golden Arrows ngoMeyi 20.
