Uyaqina umkhankaso wonozinti kwi-Orlando Pirates, icuthele noweSundowns

By Alfred Ngubane 

I-Orlando Pirates seyiwuqinisile umkhankaso wayo wokuqinisa ethimbeni lonozinti ngesizini ezayo njengoba kulindeleke idedele ababili abanamava. 

Kuvela ukuthi leli qembu lifuan onozinti ababili abanamava elizoqinisa ngabo ukuze lizokwazi ukudedela uSiyabonga Mpontshane noRichard Ofori. 

U-Ofori, osanda kululama ekulimaleni kwesikhathi eside nokwamvimba ukuthi angayi eNdebeni yoMhlaba ngoNovemba, kuthiwa angase aye phesheya. 

Uvele lo nozinti wake wathi qu phesheya ngaphambi kokulandwa yiMaritzburg United ahlale kuyo iminyaka emithathu ngaphambi okuthengwa yi-Orlando Pirates. 

UMpontshane yena useshaywa yiminyaka futhi uvele usenenkontileka evuselelwa unyaka nonyaka kanti kulokhu kungenzeka akhale ngaphansi. 

Impempe ike yabika ekuqaleni kweviki ngokuthi sekusele kancane i-Orlando Pirates incintele iKaizer Chiefs kunozinti weTS Galaxy uMelusi Buthelezi. 

Manje sesithole ukuthi leli qembu laseSoweto seliqalile nangokubuza ngoweMamelodi Sundowns uReyaad Pieterse. 

Lo nozinti oneminyaka engu-31 kuvela ukuthi uzophelelwa yinkontileka kwiSundowns ekupheleni kwale sizini yize kusenombandela wokuthi ingelulwa. 

Nokho kuthiwa akeneme njengoba eseze wakhula impela kodwa ijezi elizwa ngendaba futhi kungenzeka acele ukukhululwa uma kuphela isizini. 

“I-Orlando Pirates isibheke ngabomvu isimo sakhe, ifuna ukwazi kwenzakalani,” kusho umthombo osondelene naleli qembu. 

“Yize engadlali njalo kwiSundowns, kodwa unamava ikakhulukazi okuyodlala e-Afrika okuyinto iPirates ezoyidinga ngesizini ezayo njengoba ibuyela khona nje.”

IPirates kubhekwe idlale kwiCaf Champions League ngesizini ezayo uma ikwazile ukuqeda endaweni yesibili kwiDStv Premiership. 

“Inkinga uMpontshane usekhulile kanti u-Ofori yena usekuveze kaningi ukuthi unesifiso sokubuyela phesheya ngaphambi kokuthatha umhlalaphansi. 

“Manje uPieterse nguye onamava abangamthola uma kuwukuthi uyadedelwa u-Ofori. Cishe ukuhamba kwakhe kuncike ekutheni uyatholakala yini uPieterse. 

“UButhelezi vele bayamfuna naye ngoba uyethembisa impela kodwa bafuna bancintisane – kube onozinti abathathu abasezingeni.”

FUNDA NALA: Aseqalile amaqembu ayiphendula umkhoma iMaritzburg United

I-Orlando Pirates yethembele kuSipho Chaine njengamanje owafika kuleli qembu engathenjwe muntu kodwa wakwazi ukudla le ndawo yokuvimba ayenze eyakhe. 

Nokho kunokukhala okukhona ngaye ikakhulukazi ngesipiliyoni njengoba abuye enze amaphutha alilimazayo iqembu.