Uphume nomopho u-Arthur Zwane ngemuva kwesibhaxu seChiefs

Abalandeli beKaizer Chiefs bazandisele amahlazo ngesikhathi beshaya umqeqeshi u-Arthur Zwane, waphuma eselimele ekhanda.

Laba balandeli bavele bayinhlekisa ngenxa yokubhacaza kweqembu labo esekuphele amasizini ayisishiyagalombili lingayazi indebe.

Ubuqaba bokushaya umqeqeshi ngelinye nje ihlazo asebelengeza phezu kwaleli lokulengisa izandla isizini yonke iqembu lingawinile lutho.

U-Arthur Zwane kuvela ukuthi ushaywe yibhodlela ebeliphoswe ngomunye wabalandeli ngemuva komdlalo wabo weDStv Premiership neSuperSport United.

Lo mdlalo bewuseRoyal Bafokeng Sports Palace eRustenburg eNorth West ngoMgqibelo ntambama kanti iChiefs ithole isibhaxu sika 1-0.

Bese kungekwesine ke emidlalweni emihlanu iChiefs ithola isibhaxu kanti kusolwa ukuthi yikho lokhu okucasule abalandeli base bephenduka izilwane.

Babe sebelinda abadlali nomqeqeshi emhhumeni la kuphunywa khona, babajikijela kodwa abebemfuna kakhulu nguye u-Arthur Zwane.

Bebecula izinhlamba behaya nesiqubulo esithi, ‘hamba Zwane hamba’ ngesikhathi bekhombisa ukungenami kwabo ngendlela izinto ezihamba ngayo.

Lokhu kwehlulwa kweChiefs kuqophe elinye irekhodi elibi kuleli qembu njengoba kungokokuqala lihlulwa imidalo engu-11 kwiligi kwisizini eyodwa.

Ngemuva kokushayeka kwakhe ekhanda, u-Arthur Zwane kudingeke ayokwelashwa akangabe esakwazi ukuyokhuluma nabezindaba njengemfanelo.

Akayena ke umqeqeshi wokuqala ukuzithola esethole induku kubalandeli beChiefs njengoba nabanye ngaphambi kwakhe kwabenza.

Owakamuva ukuhamba kabi kwiChiefs nguSteve Komphela okwaze kwalinyazwa nempahla eMoses Mabhida Stadium eThekwini abalandeli befuna ahambe.

Bakwenza lokhu kulandela ukushaywa kwabo emdlalweni wamanqamu kwiNedbank Cup yiTS Galaxy ngo-2019.

IChiefs beyingakasho lutho ngalesi sigameko futhi kuzobhekwa ngabomvu ukubona ukuthi bazokwenza njani abaphathi beqembu ngemuva kwalesi sigameko.

Abaphathi bebelokhu bekuveza njalo ukuthi bameseka ngokugcwele lo mqeqeshi futhi bazomeseka kuze kulunge.