Okwenza uMahlasela abone bezoyibhubhisa ngenduku iChiefs

UKabelo Mahlasela, odlalela iRoyal AM, uthi abalandeli abeze bazobona kuhlohlwa amagoli uma sebebhekene neKaizer Chiefs ngeSonto.

IThwihli Thwahla izokwamukela Amakhosi emdlalweni weDStv Premiership, eHarry Gwala Stadium, eMgungundlovu, ngeSonto ngo-3.30 ntambama.

“Ngeke ngisho ukuthi umdlalo uzophela kumi kanjani kodwa ngingakwethembisa ukuthi sizobona amagoli ngeSonto,” kusho uKabelo Mahlasela oke wadlala kwiChiefs.

“Abalandeli bazobona amagoli futhi ngicabanga ukuthi kumele beze ngobuningi babo (enkundleni) ngoba kuzoba umdlalo ohehayo kakhulu.”

IChiefs isendaweni yesithupha kwilogi ngamaphuzu angu-25 emidlalweni engu-16 yeligi.

Igcine ukungena enkundleni ngesikhathi ibhekene neSekhukhune United, emdlalweni ophele ngo 1-1, ngoDisemba 30.

Ngakolunye uhlangothi iRoyal AM idonsa kanzima kwilogi yeDStv Premiership, njengoba isendaweni yesithathu ukusuka emsileni.

Inamaphuzu angu-18 emidlalweni engu-16. Isawine kahlanu yase ithola isibhaxu kayisikhombisa. Mithathu eyidlale ngokulingana.

Emdlalweni wokugcina weligi iRoyal AM ibhaxabulwe kabuhlungu AmaZulu FC ngo 3-0 ngoDisemba 29.

“Ngikholwa wukuthi abadlali bethu baqinile ngokomqondo, futhi bawulungele umdlalo,” kuqhuba uKabelo Mahlasela.

FUNDA NALA: Obedlala kwiChiefs usegcine ebuyele kwelakubo

“Ngicabanga ukuthi abalandeli bazokuba sohlangothini lwethu. Bazodlala indima enkulu kakhulu, futhi ngiyakholwa ukuthi uma sinengcindezi sisebenza ngokuzikhandla kakhulu.”