U-Infantino weseka uVinicious Junior okhala ngokucwaswa eSpain
By Sihle Ngubo
Umengameli wenhlangano ephethe ibhola emhlabeni, uGianni Infantino, usephumele obala weseka umdlali weReal for Madrid uVinicius Junior.
Lokhu kwenzeke ngemuva kokuthi lo mdlali ethe iLaLiga neSpain “bacwasa ngokwebala” kulandela isehlakalo sokucwaswa kwakhe ngabalandeli bebhekene neValencia eMastalla Stadium ngeSonto.
UVinicius Junior ukhombe izihlwele ebezimethuka nokuze kwaphoqa ukuthi kumiswe umdlalo imizuzu eyishumi.
Ube esegxavulana nabadlali beValencia nokwenze ukuthi akhishwe ngesiwombe sesibili. IMadrid ishaywe ngo 1-0 kulo mdlalo.
Lo mdlali waseBrazil ube esengena kwiTwitter wabhala wathi, “Ukucwasa ngebala yinto ejwayelekile kwiLaLiga”,.Ube esechaza iSpain “njengezwe elicwasa ngebala.
“Ngiyameseka ngokuphelele uVincius. Ayikho indawo yokucwasana ngebala ebholeni noma emphakathini.
“IFifa yeseka bonke abadlali asebeke bazithola bekulesi simo,” kusho u-Infantino esitatimendeni.
“Okwenzeke emdlalweni weValencia neReal Madrid kukhombisa ukuthi lokhu kumele kusukunyelwe. Yikho nje sinezinyathelo ezintathu emiqhudelwaneni yeFifa futhi ziyadingeka kuzo zonke izigaba zebhola.
“Okokuqala umisa umdlalo, wenze isimemezelo. Okwesibili, abadlali bayaphuma enkundleni bese okhulumayo amemezele ukuthi uma ukuhlasela kuqhubeka umdlalo ngeke uqhubeke.
“Umdlalo uyaqhubeka bese okwesithathu, uma ukuhlasela kuqhubeka, umdlalo uyamiswa bese amaphuzu amathathu anikwe izimbangi.”
FUNDA NALA: ISekhukhune kuzomele iqaphele isihibe esikhube iMarumo Gallants
U-Infantino uthe imizamo yokulwisana nokucwasa kumele yesekwe nakwezemfundo. UVincius Junior uthole ukwesekwa okukhulu ngemuva kwalesi sehlakalo. Kulabo abamesekile kukhona umengameli waseBrazil uLuiz Inacio Lula da Silva nomqeqeshi weReal Madrid uCarlo Ancelotti. Akukona okokuqala lo mdlali ecwaswa kwiLaLiga
