Iyakuphinda lokho iChippa, uSeema ukhonjwa indlela
By Sihle Ngubo
Ngemuva kokuphunyuka sekuvalwe amehlo (ngosuku lokugcina) ezembeni iqembu leDStv Premiership, iChippa United, lizoba nomqeqeshi omusha ozolihola uma sekuqala isizini entsha ngo-Agasti.
Lokhu kudalulwe usihlalo walo, uSiviwe ‘Chippa’ Mpengesi, ekhuluma ne-Inksport kusaphele izinsuku ezimbalwa leli qembu laseGqeberha liphumelele ukuhlala kwiPremiership.
IChippa isinde ngokuthi ibambane ngo 1-1 neLamontville Golden Arrows emdlalweni wokugcina ngoMgqibelo.
ULehlohonolo Seema uyena obenikwe umsebenzi wokuhlala ebhentshini emidlalweni emine yokugcina njengoba bekuphela isizini, wayivikisa izembe iChippa.
Uqoqe amaphuzu amane iqembu lasinda ezembeni, laphinde lagwema ukudlala imidlalo yokuhlunga.
“Ngeke siqhubeke noSeema. Uhlelo bekuwukuthi uzobamba izintambo kuze kube umdlalo wokugcina wesizini, akukho obekungale kwalokho.
“Njengamanje ngimatasa ngithungatha umqeqeshi omusha,” ucashunwe esho kanje uMpengesi.
Kuvela ukuthi njengoba ededelwa nje uSeema, kungas ekubuye uMorgan Mamilla oke waqeqesha isikhashana keluli qembu ngesizini ephelile.
Lo sihlalo weChilli Boys uphinde waveza ukuthi bahlela ukubuyela ekudlaleni imidlalo yasekhaya eMdantsane ngesizini ezayo.
Leli qembu belingakwazi ukudlala imidlalo yalo eSisa Dukashe Stadium, kulandela ukuthi iPremier Soccer League (PSL) yaveza ukuthi le nkundla ayikulungele ukuthi kudlalwe kuyona imidlalo yePSL.
“Sizosiza abantu eMdantsane ngaphambi kokuthi sidlale imidlalo yethu laphaya futhi,” kuchaza uMpengesi.
“ISisa Dukashe ibingakulungele ukuthi kudlalwe imidlalo kuyona, kanti iBuffalo City Stadium ibinenkinga yezibani.
“Kulezi zinyanga ezimbili ngaphambi kokuthi kuqale isizini ngizobheka iBuffalo City Stadium bese ngenze isiqiniseko sokuthi yonke into iqondile uma sekuqala isizini.”
FUNDA NALA: IKaizer Chiefs isingenele umbango wokusayina umgadli weGallants
Uveze ukuthi iChippa ngeke ikwazi ukusebenzisa iWolfsons Stadium, eKwaZakhele, eGqeberha, ngoba inenkinga efanayo neyeSisa Dukashe.
“Uyazi ukuthi iPSL ifuna into eqondile uma kukhulunywa ngezinkundla okudlalelwa kuzona.
“IBuffalo City Stadium iyona elandelayo ngemuva kweNelson Mandela Bay Stadium.”
