IDowns ichithe u-Andile Jali sekusele inyanga kuphele inkontileka
By Sbongs Gumbi
Bese kusele isikhathi esingaphezulu kancane kwenyanga inkontileka ka-Andile Jali kwimamelodi Sundowns iphele kodwa leli qembu selivele lamkhulula.
Indlela okwenzeke ngayo yenza kusoleke ukuthi bese kukhona ukungezwani phakathi kuka-Andile Jali naleli qembu.
Izindaba zokuchithwa kwakhe ziqinisekiswe yiyo iSundowns esitatimendeni esikhiphe ngoMgqibelo ntambama.
“Inkontileka ebiphakathi kweMamelodi Sundowns no-Andile Ernest Jali ebizophela ekupheleni kwesizini seyinqanyuliwe ngokuvumelana kwaz zombili izinhlangothi.
“Lo mdlali owake wagijima kwiBafana Bafana ujoyine iSundowns ngoJuni ka-2018 nga[phambi kokuqala kwesizini ka-2018/19, futhi ubesehlale eChloorkop amasizini amahlanu.
“Kulesi sikhathi ekwiSundowns, lo mdlali wasesiswini udlale imidlalo engu-142 futhi unqobe izicoco zeligi amahlandla amahlanu, okumenza omunye wabadlali abanezindondo eziningi kwiPSL.
“Siyambonga u-Andile ngakwenzele iqembu futhi simfisela okuhle ngekusasa lakhe. Iqembu nabalandeli balo bazohlezi benezinkumbulo ezinhle ngakwenzile kwiKa Bo Yellow,” besifundeka kanje lesi sitatimende.
Maningi ke amaqembu abesevele emataniswe nawo uJali. Kodwa kuyacaca uhambe ubudlelwano bungasebuhle kwiSundowns.
Usanda kundiza ezinkundleni zokuxhumana njengoba kuvele ividiyo yakhe edla utshwala nabangani bakhe.
Uke wamiswa naseqenjini ngezinsolo zokuthi wafika ejimini buseliwe. Kodwa lezi zinsolo zagcina zingaqinisekiswanga.
Imenenja yakhe uMike Makaab usanda kuveza ukuthi akhona amaqembu amhalelayo uJali futhi alinde ukubona kwenzakalani ngaye kwiSundowns.
FUNDA NALA: UMokwena ucacisa ngekusasa lakhe kwiMamelodi Sundowns
Wathi kukhona nawaphesheya namanye kuleli. Impempe isanda kuhosha umoya ukuthi kukhona nawaseTanzania acuthile ukuzwa kwenzakalani ngaye.
Kuzothatha amehlo ke ukubona ukuthi uzophelelaphi njengoba kuke kwavela nokuthi angabuyela nakwi-Orlando Pirates azakhela kuyo igama.
