ICasric Stars ayililahlile ithemba lokudlala kwiPremiership ngezayo
By Sbongs Gumbi
Ukusala ekugcineni embangweni wokungena kwiDStv Premiership akuyikhubanga iCasric Stars engelinye lamaqembu abebhekiwe ekuhambeni nesicoco kwiMotsepe Foundation Championship.
ICasric Stars yasala ngosuku lokugcina ngesikhathi ibambana ngo 2-2 ne-All Stars emdlalweni wokugcina weligi emavikini ambalwa edlule.
Kwagcina kube yiPolokwane City ompetha njengoba yabhudluza iPretoria Callies ngo 4-1 emdlalweni wayo wokugcina. Yathola nethikithi lokudlala kwiPremiership ngesizini ezayo.
Lokhu kwasho ukuthi iCasric Stars iphelela endaweni yesithathu. Kwaba yiCape Town Spurs ethatha indawo yesibili.
ISpurs nayo yabambana ne-University of Pretoria ngo 1-1 emdlalweni wokugcina kulesi sigaba. Manje yona neCasric Stars sebezodlala kweyokuhlunga.
Bazojoyinwa yiMaritzburg United eqede endaweni ka-15 kwiPremiership kule midlalo eqala ngeSonto ntambama.
ICasric Stars yiyo enethuba lokuhlala phezulu zisuka kule logi yamaqembu amathathu njengoba izoqala ekhaya ibhekene neSpurs.
Lo mdlalo uzoba seSolomon Mahlangu Stadium ngeSonto ngo-3 ntambama. Umqeqeshi weStars, uBucs Mthombeni uthi basazolwa.
“Sahlala phansi nabadlali sabatshela ukuthi akubhedanga kakhulu kwazise bekuyisizini yethu yokuqala le,” kusho lo mqeqeshi.
Leli qembu lingene kulesi sigaba ngokuthenga isitifiketi seFree State Stars. UMthombeni uthi bayaziqhenya ngabakuzuzile.
“Awamaningi amaqembu angakwazi ukuqoqa amaphuzu esiwaqoqile ngesizini yokuqala,” usho kanje ekuluma nabeSowetan.
“Kodwa ke vele ebholeni izimanga ezinjena ziyenzeka. Ebholeni kumele uhlale ulindele okuhle nokubi. Kuyenzeka uthi uzitshela ukuthi uyawina la, bese uhlulwa.
“Kodwa manje sesinethuba lesibili, leliya (elokunqoba isicoco) ngeke lisabuya. Manje sesilungiselela imidlalo yokuhlunga la sinemidlalo emine khona.”
Uthe bayazi babaphoxa kakhulu abalandeli ngokungasinqobi isicoco kodwa wathi basazozama ukufeza iphupho lokudlala esigabeni esiphezulu.
“Salinyusa kakhulu izinga, senza balindela izinto ezinkulu. Abalandeli bethu baphoxeka impela. Bebephuma ngobuningi babo uma sidlala ekhaya.
FUNDA NALA: UPaseka Mako uklolodele ababebiza uRiveiro ngoplamba
“Bekuthi uma sike sashaya igoli, kuzamazame inkundla. Bebeseseka ngokuphelele.
“Abantu baKwaMhlanga bayaseseka kakhulu. Kumanje sithola ukuxhaswa wumasipala kanti nabefundisi bendawo bayasithandazela, basitshela ukuthi silwe.”
