Ngabe iKZN izophinde idlale iNorth West kwiComrades?
By Alfred Ngubane
IKwaZulu Natal isenkingeni enkulu kwiComrades Marathon njengoba iNorth West iza nabasubathi abahlangene abajima ndawonye.
Kukhona iNedbank Running Club eholwa nguDave Adams ongumqeqeshi wayo enabasubathi abasatshwayo kwiComrades.
Kubo kukhona u-Edward “Slender” Mothibi owaba ngumphetha weComrades Marathon ka-2019, walala isibili kweka-2022.
Kukhona noTete Dijana ozovikela isicoco njengoba kunguye oyinqobe ngonyaka odlule, besekube nguJonas Makhele oqede endaweni yesibili ngo-2021 kwiNedbank Runified 50 km.
NoJoseph Manyedi owangena endaweni yesihlanu kwiComrades yanyakenye, uLudwick Mamabolo owayinqoba ng-2012, uClaude Moshiywa owayinqoba ngo-2013 nabo bakuleli qoqo.
Singabashiya kanjani nje ngaphandle oDaniel Khonkhobe, Daniel Moselakwe nentokazi ephume endaweni yesithupha ngonyaka odlule uGalaletsang Mekgoe.
Ngasohlangothini lweHot Running Club eqeqeshwa nguJohn Hamlet khona kuboshelwe uGift Kelehe owayinqoba ngo-2015.
Kwi-Intsika AC khona kukhona uNtsindiso Mphakathi ongumphetha wePrince Mangosuthu Marathon amahlanhla amabili kulandelana, Msawenkosi Mthalane noGaolathe Lesedi.
I-Impala AC yona izohlokoloza ngoDavid Gatebe ongumphetha weComrades ka-2016.
IKZN yona ithembele kubasubathi ababili kuphela okungoBongumusa Mthembu we-Arthur Ford nosebe ngumpetha amahlanhla amathathu, noNkosikhona Mhlwakwana weHollywoodbets Running Club. UMhlakwana ungumphetha wePrince Mangosuthu Marathon kanti kwiTwo Oceans Marathon waphuma isibili ngonyaka odlule.
FUNDA NALA: Kuzoncishiswa abagadli kwi-Orlando Pirates ngesizini ezayo
Ngale kwalokho kuzoba nzima ngoba abasubathi abanohlonzo abaphuma eNorth West bathi bazogada uBongumusa Mthembu noNkosikhona Mhlwakwana.
Abekho abanye abasubathi abayingozi okwamanje eKZN, kuthiwa basho njalo.
