UMakaab udedela ibhomu emaqenjini ahalela uManqoba Mngqithi
By Sbongs Gumbi
UManqoba Mngqithi uhalelwa emaqenjini amabili eDStv Premiership njengoba kunenkolelo yokuthi uzoshiya kwiMamelodi Sundowns ngoJulayi.
AmaZulu FC asekuvezile ukuthi angakujabulela ukumthola kuwukuthi athi ahlonipha iSundowns ngakho ngeke akhulume naye esanenkontileka khona.
KwiKaizer Chiefs khona ufunwa kakhulu ngabalandeli abafisa nokuthi okungcono akazokhulisa u-Arthur Zwane.
Kodwa imenenja yakhe uMike Makaab weProSport International usevele wadedela ibhomu eliqede wonke amathemba ukuthi lamaqembu angamthola lo mqeqeshi.
Ngokusho kukaMakaab kwabeSABC Sport, ayikho le yokuthi uManqoba Mngqithi uphelelwa yinkontileka kwiSundowns ngoJuni.
“Sengike ngakusho lokhu phambilini. UManqoba usanenkontileka neMamelodi Sundowns kuze kube nguJuni ka-2024.
“Usasalelwe ngenye isizini kuleli qembu,” ucashunwe esho kanje uMakaab. Bese kusabalele imibiko ethi iyaphela kulo Juni esibheke kuye.
“Usajabule kwiSundowns futhi ngaphandle kokuthi ajike ukucabanga, uManqoba usazohlala kwiMamelodi Sundowns kule sizini ezayo.”
Kuke kwavela ke nokuthi kukhona amaqembu aseke asifaka isicelo sokuthi uManqoba Mngqithi azosebenza kuwo. Kodwa uMakaab uyakuchitha lokhu.
“Cha. Akukho qembu eselike lavela ngokusemthethweni. Khona kuke kwanemibiko esabalalayo kodwa ngeke ngikukhumbuze ukuthi ayinuki ingosiwanga.
“Kodwa thina ngokwethu, futhi ngikhuluma nawe njengemenenja kaManqoba, ungumuntu ophansi nowuhloniphayo umsebenzi wakhe.
“Engingakuqiniseka ngakho wukuthi uma kukhona afisa ukukusho, siyohlangana kuqala bese sibona ukuthi siya kanjani phambili ukusuka lapho.
FUNDA NALA: Ngabe iKZN izophinde idlale iNorth West kwiComrades?
“Ukukhuluma iqiniso nje okwamanje uManqoba usenenkontileka kwiSundowns kuze kube nguJuni 30 wangonyaka ozayo.
“Futhi uzimisele impela ukuyihlonipha ize iphele le nkontileka yakhe,” kuchaza uMakaab.
