IMaritzburg ithembe izibani nabalandeli koweCasric Stars
By Sbongs Gumbi
ICasric Stars ayikujwayele ukudlala ebusuku sekukhanya izibani kanti iMaritzburg United izofuna ukukusebenzisa lokhu uma lamaqembu esebhekene eHarry Gwala Stadium.
IMaritzburg izobe iqala umkhankaso wayo wokuzama ukuhlala kwiDStv Premiership njengoba izodlala kweyokuhlunga nje.
Izogadulisana neCasric Stars kule nkundla yayo. Umqeqeshi uFadlu Davids uthi njengoba bezobe besekhaya phambi kwezinkumbi zabalandeli, kumele benze kahle.
“Kusobala okulindeleke kithi, uma ubheka la sisuka khona,” usho kanje uDavids ngaphambi kwalo mdlalo wangoLwesithathu kusihlwa.
“Besisesimweni la kuthe isizini iphakathi kwakhona asebesibona sesivele sizidliwele yizembe.
“Kodwa silwile saze sasuka emsilweni welogi ngosuku lokugcina lwemidlalo yeligi, sangena kweyokuhlunga.
“Lokho kusinike intuba esingeke siyithathe kancane. Sizoya kule midlalo ngokuzimisela okufanayo nalokhu ebesinakho emidlalweni yokugcina”.
Kuzobe kungokokuqala iMaritzburg ibhekana neCasric Stars eqede endaweni yesithathu kwiMotsepe Foundation Championship.
Nokho uDavids akanavalo ngalokho njengoba ethi bazinike isikhathi sokuzihlaziya kahle lezi zimbangi zabo.
“Asikaze sidlale nabo phambilini, kodwa sibahlaziye kahle futhi sibabonile bedlala ekhaya.
“Sibabonile futhi bengekho ekhaya, sababona nokuthi beza namuphi umuzwa kule midlalo yokuhlunga.
“Le midlalo ihlukile ngoba sizodlala imidlalo emine ukuze sibuyele esigabeni esiphezulu.
“Kodwa sizobe sidlala ebusuku eHarry Gwala phambi kwabalandeli bethu ngakho lokhu kuyasisiza,” kuchaza lo mqeqeshi.
UDavids uthi abadlali bakhe abakayicabangi nje eyamaholidi njengoba kusongwe isizini kodwa bona besadlala.
Uthi bayakwazi ukubaluleka komsebenzi okumele bawenze wokugcina isitifiketi seqembu sokudlala esigabeni esiphezulu.
“Siyazama ukuthi singabanaki labo asebeseholidini. Lena intuba esiyinikiwe yokuphunyula ezembeni.
“Ngeke ke siyibuke ngokuthi iyisiphazamiso kodwa njengethuba elihle esilamukela ngezandla zombili.”
FUNDA NALA: AmaZulu asethole isicelo somsebenzi kumqeqeshi waseHolland
Uma iMaritzburg United iyishayile iCasric Stars, kuyobe sekuyibhedele kule midlalo yokuhlunga.
Phela iyivule ngesibhaxu isekhaya la ishaywe khona yiCape Town Spurs okuyiyo ebhekiwe ukuthi idle le ligi.
