Kudume izulu lezandla kuwashiswa Umsinga United ijezi

Intatheli yeMpempe

Kwenzeke ihlazo eHarry Gwala Stadium abalandeli bengena enkundleni besho ukuzibambela ngezandla konompempe ngemuba kokuwina kwe-Orbit College ishaya Umsinga United. 

Ukuhlulwa kwaMabhubesi kusho ukuthi asazophinde aqhukuze khona kwi-ABC Motsepe League nangesizini ezayo. 

Nokho ibe seyenza into enganambithisiseki ekupheleni komdlalo abalandeli bengena enkundleni ngenkani, kwagcina kuqhuma nesibhamu. 

Abantu babaleke bayobhaca sekushubile bebona libashonela emini njengoba bekuqhuma isibhamu nje esiyisikhali esiyingozi kakhulu. 

Abebesenkundleni ke basola nobudedengu kwabahleli balo mqhudelwano wokuhlunga ngokungaqinisi ezokuphepha. 

Kuvela ukuthi bekungekho nelilodwa iphoyisa kodwa bekungonogada nabo bengenele ukuthi bengabhekana nesimo sokubhiyoza kwabalandeli. 

Yize kungakaqinisekiswa, kodwa kusolwa ukuthi abalandeli noma abebeseka Umsinga laba abasuse umsindo ngemuva komdlalo. 

Kuqale abalandeli balo leli qembu laseMabomvini, Emsinga bejukujela izinto enkundleni umdlalo ungakapheli.

FUNDA NALA: Right, i-Orbit iyanyuka, i-Upington iyanyuka, Umsinga usayala

Leli qembu labo lihlulwe ngo 1-0 kulo mdlalo kanti ngeke lisaya kowamanqmau noma kwiMotsepe Foundation Championship ngesizini ezayo. 

Wudaba oluqhubekayo lolu futhi Impempe izokubikela uma kukhona okunye okusha okuvelayo ngalo.