UBroos udalula akuxoxa noKhoza wePSL ngeBafana
Umqeqeshi weBafana Bafana uHugo Broos useveze ukuthi sigcine sifezekile isifiso sakhe sokuhlangana nosihlalo wePremier Soccer League u-Irvin Khoza.
Nokho lo mhlangano awuzange ube mude njengoba uKhoza ephikelele ekutheni kube khona wonke amaqembu angu-16 eDStv Premiership ezingxoxweni zabo.
Phambilini uHugo Broos ubezwakalise ukuphatheka kabi ngePSL ngokungasihambisani nesicelo seSouth African Football Association sokumisa isizini ngoDisemba 24 nyakenye.
Lesi sicelo senzelwe ukunika iBafana isikhathi esengeziwe sokuzilungiselela imidlalo ye-Africa Cup of Nations (Afcon).
Ngeshwa, isizini yaqhubeka kwaze kwaba wusuku lokugcina luka-2023, okushiye iBafana inamasonto ambalwa nje okulungiselela umdlalo wayo wokuqala we-Afcon.
IBafana yenze kahle kwi-Afcon e-Ivory Coast, lapho iphelele khona endaweni yesithathu ingabhekiwe.
Nokho uHugo Broos uphinde wagcizelela inhloso yakhe yokuxoxisana noKhoza mayelana nokwesekwa kweBafana yile nhlangano.
Unethemba lokuthi bazodingida izindlela iPSL ezokwazi ngazo ukwamukela nokweseka amaqembu esizwe ngamalungiselelo awo.
“Ngihlanganile noKhoza futhi ngiyakuqonda akusho,” kusho uBroos ekhuluma ese-Algeria la iBafana inemidlalo emibili khona.
“Akubanga umhlangano omude, wavele wangitshela ukuthi umele amaqembu angu-16 esigaba esikhokhelayo.
“Wabe esethi, ‘Angifuni le ngxoxo ibe phakathi kwami nawe kuphela. Kungaba ngcono nabanye babe khona.
“‘Angikwazi ukuthathela abanye abantu izinqumo nokubakhulumela’.
“Ngakho sawuhlehlisa umhlangano futhi sizophinde sibe nomunye uma sengibuyele eNingizimu Afrika ngasekupheleni kuka-Ephreli noma ngemuva kwePhasika.
FUNDA NALA: Bafikile ekhempini yeBafana abeDowns ‘abalimele’
“Ngakuqonda ayekusho uKhoza,” kuchaza lo mqeqeshi ungafunga wakhatshwa yihhasi esifubeni indlela angenasifuba ngakhona.
