IChiefs seyidayise uSiyabonga Ngezana kwelaseRomania

IKaizer Chiefs seyimemezele ukuthi uSiyabonga Ngezana uyashiya kuleli qembu njengoba esedayiselwe iqembu laseRomania.

USiya Ngezana usezodlala kwiFotbal Club SB, ebiyaziwa ngeSteaua Bucharesti phambilini, ngokusho kwesitatimende seChiefs.

Lesi sitobha esineminyaka engu-25 siphuma enkulisa yeChiefs la saphekwa khona ngu-Arthur Zwane okuvela ukuthi uyachithwa kuleli qembu.

IFC SB le uSiya Ngezana aya kuyo kuthiwa iyiqembu elikhulu eRomanis futhi seyiwine iligi enkulu yakhona amahlandla angu-26.

“Kuhlezi kunomuzwa wobuhlungu uma umdlali okhulele la phambi kwethu esesishiya,” usho kanje uKaizer Motaung Junior ngoSiya Ngezana.

“Nokho uSiya usebenze kahle kwiKaizer Chiefs futhi ubona sekuyisikhathi sokuthi ayothola inselelo entsha manje.

“Siyambonga ngokuzinikela kwakhe kuMakhosi futhi simfisela okuhle kodwa njengoba eqala impilo entsha e-Europe.”

Uhamba nje uNgezana iChiefs ngeke imkhalele kakhulu kwazise inenqwaba yabadlali basemuva ekubeni kukhona abanye ababili abaseza.

UNgezana ubesakhe ubudlelwano obuhle no-Edmilson Dove odongeni lwasemuva kwiChiefs ngesizini edlule.

Khonamanjalo, iChiefs kulindeleke yethule abadlali bayo abasha maduze nje kanti kubo kukhona abasemuva oThatayaone Dithlokwe noGiven Msimango.

UDithlokwe ubekwiSuperSport United kanti uMsimango yena ubekwiTS Galaxy la abengukaputeni khona.

Ngesikhathi iChiefs imemezela lezi zindaba ezinkundleni zokuxhumana, abalandeli bebebheke ukuthi izokwethula umqeqeshi.

Phela leli qembu kubikwa ukuthi lisezingxoxweni noNasreddine Nabi waseTunisia ukuba azolicija ngesizini ezayo.

Lo mqeqeshi usevele ushiyile kwiYoung Africans abekuyo ngesizini edlule la ewine khona izicoco ezintathu kulandelana.