Usethole ikhaya elisha uPitso Mosimane
Sbongs Gumbi
Kungakapheli neviki ememezele ukuthi useshiyile kwi-Al ahli yaseSaudi Arabia, uPitso Mosimane usethole ikhaya elisha.
Lo mqeqeshi onamava ubevele ephenduke inyama ngesikhathi kuvela ukuthi akasenaqembu.
Bekubhekwe ngabomvu ukubona ukuthi uzophelelaphi. Manje Impempe seyingakuveza ukuthi uPitso Mosimane usezocija iqembu lase-United Arab Emirates (UAE)
I-Al Wahda FC imethule ngoMgqibelo kusihlwa lo mqeqeshi ezinkundleni zayo zokuxhumana. Lokhu kuqede ukuqagela ngekusasa lalo mqeqeshi.
“I-Al Wahda seyiqashe umqeqeshi waseNingizumu Afrika uPitso Mosimane ukuthi azoba ngumqeqeshi omkhulu weqembu,” libeke kanje leli qembu.
Leli qembu lidlala esigabeni esiphezulu e-UAE. Kuzothatha amehlo ukubona ukuthi uPitso wenza kanjani kulo.
FUNDA NALA: UDavid Thidiela uphoxwe amazwi enkakha uShaun Barlett
Kwi-Al Ahli ushiye egile izimanga njengoba afika ivika izembe, wahamba seyingompetha futhi seyinyukele esigabeni esikhulu.
Kuxakile ke nokho ukuthi kungani leli qembu liqoke ukumyeka ahambe yize e ze umsebenzi omuhle kanjena.
