Ngabe ‘ukufeyila’ kukaPitso uSaudi Arabia kuzojabulisa iChiefs?
SIHLE NGUBO
Mancane amathuba okuthi uPitso “Jingles” Mosimane ahlale eSaudi Arabia kulandelala ukudliwa yizembe kweqembu lakhe, i-Abha Club, kwiSaudi Pro League, ngoMsombuluko.
EzikaMosimane zidliwe yi-Al Hazem ngo 2-1, ebisivele igawulwe yizembe, emdlalweni wokugcina obekumele ziwunqobe nakanjani ukuze zisinde ezembeni.
Ukungaphumeleli kwe-Abha ukugwema izembe kufanele ukuthi kwehle kahle emaqenjini agaqele ukuthi lolu qweqwe lomqeqeshi, oneminyaka engu-59, luzowaqeqesha ngesizini ezayo.
Kulawo maqembu kubalwa neKaizer Chiefs ebe nesizini embi njengoba iqede endaweni yeshumi kwilogi yeDStv Premiership, yaphuthelwa ukuyodlala kwiMTN8 ngesizini ezayo.
Abazazi zonke zeChiefs bathi abaphathi beqembu bebesibhekile isimo sikaMosimane ukuthi uqeda kanjani eSaudi Arabia. Kuthiwa bazimisele ukushaya iphakethe, bamnike imali lo mqeqeshi ukuthi azisayinele yena abadlali afuna ukusebenza nabo.
Uma iChiefs imthola uMosimane uzobe esesizwa uManqoba Mngqithi, oyiphini lomqeqeshi kwiMamelodi Sundowns, noLehlohonolo Seema, osanda kumiswa yiSekhukhune United.
Kuvela ukuthi uMngqithi angaba yinhloko yabaqeqeshi kwiChiefs, uma engezi uMosimane, bese asizwe uSeema noRomain Folz, oke wafika AmaZulu FC.
Abanye abasibheke ngabomvu isimo sikaMosimane yiCameroon efuna azocija iqembu lakhona lesizwe.
Ngaphansi kukaMosimane i-Abha iqoqe amaphuzu angu-18 emidlalweni engu-15. Beyinamaphuzu angu-14 emidlalweni engu-19 ngesikhathi lo mqeqeshi, oke wacija iSundowns, ethatha izintambo.
FUNDA NALA: URulani uphefumula ‘ngomjuxuzo’ kaThembinkosi Lorch
UMosimane ubesayine inkontileka yezinyanga ezine kuphela naleli qembu laseSaudi Arabia. Akubukeki ezoya nalo ehlathini njengoba lidliwe yizembe.