AwaseRomania asevule imboni kwiKaizer Chiefs
Njabulo Shezi
Isiphenduke imboni iKaizer Chiefs emaqenjini aseRomania njengoba sekukhona eselivelile elizofuna omunye wabagadli baleli qembu.
IKaizer Chiefs isanda kudayisela iFC SB umdlali wasemuva uSiyabonga Ngezana njengoba sekuvela ukuthi kukhona elinye elizibika.
Leli eliza manje kuthiwa lizocela isihlobo esihle ngomgadli u-Ashely Du Preez kanti liza namaphakethe aqumbile.
“Izolingeka iChiefs uma kuwukuthi leli qembu liyaqinisa kulokhu elithe lifuna ukukwenza,” kusho umthombo.
“Igama lalo liyangidida ngoba sengililibele kodwa kuthiwa lifuna uDu Preez, kanti liphethe uR23-Million esandleni elifuna ukumthenga ngawo.”
IKaizer Chiefs ivele iyazishodela kubagadli futhi beyingeke ifise ukuthi kube khona iqembu elizofuna omunye wabo njengamanje.
Kodwa le mali okuthiwa liza nayo elaseRomania cishe izoyilinga bese imdedela ahambe yize nakuyo esahlale isizini eyodwa.
Lo mgadli iChiefs yamthenga kwiStellenbosch FC kanti yize engabanga nesizini eyisimanga, uveze izimpawu zokuthi uzoba yinkunzi ngokuhamba kwesikhathi.
Kodwa ke ngoba vele kubukeka izogcina imtholile uRanga Chivaviro obekwiMarumo Gallants, cishe ingamdedela.
FUNDA NALA: IRichards Bay icathamela umdlali ochithwa wuSuthu
Izindaba zokuthi uChivaviro ziqinisekiswe yiGallants ngoLwesihlanu ngesikhathi ikhipha amagama abadlali abashiyayo kuyo.
Kodwa ke kusafufusa umbango ngaye ngoba neRichards Bay imile kwelokuthi ngumdlali wayo lona.
Khonamanjalo, iChiefs seyimemezele ukuthi u-Itumeleng Khune uzodlala isizini yakhe yokugcina ngale ezayo njengoba ezothatha umhlalaphansi uma iphela.
Ithi uzonikwa eminye imisebenzi khona eqenjini uma esewabeke ethala amakhokho. Kuzobe kungunyaka ka-20 lona uKhune edlala kwiChiefs.
