Iminwe ikhomba kuDanny Jordaan ngehlazo leBanyana Banyana
Alfred Ngubane
Umhlaba wonke ubuka undlovukayiphikiswa onguDanny Jordaan osolwa ngokunqaba ukuqinisekisa abadlali beBanyana Banyana ukuthi bazoyithola iphelele imali abayitheniswe yiFifa.
IBanyana iya eNdebeni yoMhlaba e-Australia naseNew Zealand kanti iFifa ithembise umdlali nomdlali ozoba kulo mqhudelwano imali engapheku kukaR500 000.
Manje ngokwazi ukuthi phambilini imihlomulo yalolu hlobo ibigcina ingafikanga kubo, abadlali beBanyana Banyana bafuna kubhalwe ezinkontilekeni zabo ukuthi bazoyithole.
Kodwa ke njengamanje lo ndlovukayiphikiswa uthele izwe ngehlazo kubuka umhlab awonke.
Abadlali beBanyana Banyana bagolozile ngempelasonto ukuyodlala umdlalo wabo wokugcina ngaphambi kokuya eNdebeni yoMhlaba.
Bebefuna kulungiswe lendaba yezinkontileka, bekhala nangokuthi inkundla abayodlaliswa kuyo ayikho ezingeni elifanele.
UNhlanhla Vilakazi ongunobhala wenyunyana yabadlali kuleli, uthi bambhalela incwandi uDanny Jordaan neSafa ngodaba lwamabhonasi abadlali njengoba beya eNdebeni yoMhlaba nje.
“Kodwa wathalalisa nje, ukuthi aphendule lutho… Njengoba ubona abadlali babambe isiteleka kodwa yena waqhubeka waqoka iqembu elidlale neBotswana,” kusho uVilakazi.
Iqembu eliqokwe isigubhukane ngeSonto emini, lidlalile neBotswana, latholinzima sika 5-0.
Kuze kube manje kusenhlanga zimuka nomoya, akukho okuhlanganayo njengoba noNdunankulu waseGauteng uPanyaza Lesufi ufike zayima emthumeni nakuye.
Nongqongqoshe wezeMidlalo, uZizi Kodwa uthembise ukulusukumela ngoMsombuluko lolu daba, wanxenxa abadlali ukuthi bangakufaki ezingqondweni lokhu okwenzekayo.
Khonamanjalo uPortia Modise uthi kumele ngabe yalungiswa kudala le nkinga ngoba bebazi ukuthi iqembu lizodlala eNdebeni yoMhlaba.
“Lokhu kuzodunga imiqondo yabadlali, bangadlali ngokuzimisela njengoba singekho isivumelwano abanaso esiphathekayo,” kusho uPortia Modise.
“Bazoyogcina icala nje enkundleni, ngemuva kwalokho bazokhohlwa yiqembu lesizwe, bazolibalekela.
“Kuzomele manje bagxile emaqenjini abadlala kuwo njengoba ubona iHollywoodbets Super League yafaka izindodla zezimali kodwa iSafa ayibaniki abadlali.
FUNDA NALA: Omunye umdlali osemncane othembisayo kwi-Orlando Pirates
“Kunalokho iyisengela emlonyeni wendoda eyodwa okunguDanny Jordaan. Abaxhasi bazobaleka manje ebholeni lakuleli. Ngikutshela iqiniso, uyosho ukuthi ngasho,” kusho uPortia Modise.
