Igejile iMarumo Gallants ifuna isitifiketi seleDStv Premiership
Njabulo Shezi
IMarumo Gallants yehlulekile emizamweni yayo yokuthenga isitifiketi sokuqhubeka idlale kwiDStv Premiership nangesizini ezayo.
Leli qembu laseLimpopo lidliwe yizembe kulesi sigaba ngesizini edlule kanti kuvela ukuthi belifuna ukubuya ngokuthenga.
Livele langena kulesi sigaba ngakho ukuthenga njengoba lathatha isitifiketi seTshakhuma Tsha madzivhandila eminyakeni emithathu edlule.
Kodwa kubhedile ngesizini edlule ngesikhathi iMarumo Gallants ifaka wonke amandla ayo kwiCaf Confederation Cup, yabe seyikhohlwa yila icosha khona iphalishi.
Lokhu kuholele ekutheni idliwe yizembe ekubeni yayihambe yaze yafika kweyandulela owamanqamu kwiConfed Cup.
Yingakho ke leli qembu belixoxisana nosihlalo weRichards Bay, uSifiso “Jomo” Biyela ngokuthi abanike isitifiketi sakhe, ngokubika kwabe-Unplayable.
Kuthiwa igejile ke nokho iMarumo Gallants njengoba obekufunwa uBiyela ngalesi sitifiketi sakhe kube ngenhla kwamadolo, yabe seyihoxa.
IRichards Bay kuthiwa ifune uR60-milllion bese kwengezwa ngesitifiketi sayo iMarumo Gallants sokudlala kwiMotsepe Foundation Championship.
Kuthiwa lokhu kube ngenhla kwamadolo kubaphathi beGallants ababe sebehoxa kulezi zingxoxo yize kuvela ukuthi basangaphinde babuye.
Kuvele ke kuke kwavela ukuthi iRichards Bay ike yadonsa kanzima ezimalini futhi umphathi engadayisa uma kungavela abafika nemali ehlakaniphile.
NabeMaritzburg United, nayo edliwe yizembe ngesizini edlule, bake babuza nabo ukuthi kungamele bafike nento engakanani uma bezofuna ukuthengiselwa isitifiketi.
FUNDA NALA: UKomphela uveza okumenze wagxuma uma kuvela iSwallows
Sekuyinto eyandile ke kwiPSL ukudayiswa kwezitifiketi njengoba iBlack Leopards ebidliwe yizembe kwiChampionship ivele yashaya ijika ngokuthatha ese-All Stars.
NeTS Galaxy kuke kwavela ukuthi isendalini, kodwa umengameli wayo uTim Sukazi wakukhaba ngazo zombili lokho.
