Iyozizwa amandla ngaphandle kwakuleli iKaizer Chiefs
Alfred Ngubane
IKaizer Chiefs izophuma maduze nje, ishaye izindawo njengoba iqedela amalungiselelo esizini entsha – izohambela amazwe ehlukene e-Afrika la izodlala khona imidlalo yokuzwana amandla.
Izoqala eTanzania bese idlulela eBotswana. NgoMgqibelo, ngoJulayi 22, iKaizer Chiefs izobhekana neYoung Africans SC eBenjamin Mkapa Stadium eDar es Salaam.
‘IYanga’, njengoba iYoung Africans ibizwa kanjalo ngakubo, ingompetha baseTanzania abavikele isicoco seligi kabili kulandelana.
Kumanje beyinabadlali abayisithupha ababizelwe eqenjini lesizwe laseTanzania, iTaifa Stars elizodlala neNiger emdlalweni wokuhlungela i-Africa Cup Of Nations ngenyanga edlule.
Lo mdlalo uhlelelwe ukuthi uqale ngo-7 ebusuku. Evikini ukusuka lapho, kuzothi ngoMgqibelo kaJulayi 29, iGlamour Boys idudulane neTownship Rollers eNational Stadium eGaborone eBotswana emdlalweni ozoqala ngo-3 ntambama.
ITowship Rollers iyiqembu eliphumelele kakhulu emlandweni wezwe laseBotswa (isinqobe izicoco zeligi nezindebe eziningi kunanoma yiziphi izimbangi zayo).
Ngaphezu kwalokho iyiqembu elihamba phambili ngabalandeli eBotswana.
Leli kuzoba yithuba lokuqala likaMolefi Ntseki lokuhlola abadlali bakhe namaqhinga akhe ukuthi ayagxila yini kubadlali.
“Le midlalo emibili esibhekene namaqembu asezingeni eliphezulu izonginika ithuba lokubheka kahle abadlali bethu,” kusho uNtseki.
“Ngizokwazi ukukala ukuthi iqembu selikusiphi isimo ngokomdlalo, ngihlole nukuthi sikuphi kumalungiselelo ethu esizini entsha,” kusho lo mqeqeshi omusha weKaizer Chiefs.
FUNDA NALA: IPirates isilidubile ‘iqili’ eliwuTerrence Dzvukamanja
Isasasa liyakhula eTanzania naseBotswana njengoba abalandeli bebhola belindele ukufika kweKaizer Chiefs – enye yamakilabhu adumile e-Afrika.
IChiefs inomsebenzi onzima oyilindile kuleli ngesizini ezayo njengoba kuzobe kuyisizini yesishiyagalolunye yayigcina indebe.
