UDumisani Zuma ‘ohluphayo’ usethole ikhaya elisha kwiSwallows
Njabulo Shezi
Umdlali osezakhele igama elibi ngokuhluleka wukuziphatha okwenze axoshwe emaqenjini amabili abedlala kuwo, uDumisani Zuma usezogijima kwiMoroka Swallows.
Lezi zindaba ziqinisekiswe yileli qembu ngoLwesithathu ntambama, lifaka ezinkundleni izithombe zakhe egqoke imibala yalo.
Imininingwane egcwele ngokusayina kwakhe ayikakakhishwa. Kodwa ngokuthola kweMpempe usayine unyaka owodwa ngombandela wokuthi uzokwelulelwa.
Umthombo ongaphakathi kuleli qembu uthi abaphathi basicubungule kahle isinqumo sabo ngaphambi kokumsayina uDumisani Zuma.
Lo mdlali onekhono elihle ikakhulukazi uma ehlasela, ubedlala kuMaZulu FC ngesizini edlule kodwa wadedelwa uma kuphela isizini.
Lokhu kungenxa yokuthi usolwa ngokuthi ubengomunye wabadlali abebedlebeleka futhi bengaziphethe kahle kuleli qembu laseThekwini.
Ngaphambi kokudlala Osuthwini, uDumisani Zuma ubedlala kwiKaizer Chiefs la ake waboshwa khona ngemuva kokubanjwa amaphoyisa eshayela ebukhile.
Yize iChiefs yazama ukumsiza, imfaka ezinhlelweni zokunqanda ukuphuza okweqile, wagcian exoshiwe ngoba ehluleka wukuyeka amankwebevu.
Yingakho abaningi sibamangazile isinqumo seSwallows sokumlanda lo mdlali, kodwa umthombo wethu uthi bayasazi lesi simo sakhe.
“Uhlale phansi nabaphathi nomqeqeshi uSteve Komphela baxoxa kabanzi,” kusho lo mthombo ocele singawudaluli.
“Uchazeliwe ukuthi kungani enikwa leli thuba osekungenzeka kube ngelokugcina kuye. Naye ukuchazile okumenza agcine engasalawuleki.
“Uyamazi ke uSteve ufana nobaba kubadlali futhi sinethemba lokuthi uzoqoqeka uDumisani Zuma uma esesebenza naye.”
UZuma ungumdlali wesibili onegama osayinwe yiSwallows njengoba isayine no-Andile Jali, naye oke wasolwa ngokweqisa eziphuzweni ezidakayo esekwiMamelodi Sundowns.
Kuvela nokuthi iSwallows isaqhubeka nokuxoxa noThamsanqa Gabuza kanti noLesedi Kapinga kungenzeka aphelele kuyo.
“EkaGabuza incike ekutheni uyatholakala yini uTshegofatso Mabasa kwi-Orlando Pirates. Uma etholakala, kungezeka bese eyekwa uGabuza.”
FUNDA NALA: UChikoya ugxeka uTerrence Dzvukamanja ngokuxhaphaza iPirates
Impempe ithole ukuthi uGabuza usezilolonga neTS Galaxy la abheke ukuheha amehlo omqeqeshi uSead Ramovic ukuze amsayine.
