UNcube uphalaza iqiniso ngesihluku asifica kuMaZulu
Umdlali wasesiswini waseZimbabwe uButholezwe Ncube uthe ubekezelele ukuxhashazwa ngabadlali abakhuluma isiZulu ngesikhathi edlala kuMaZulu FC.
UNcube ubekuMaZulu kusukela ngo-2016- kuya ku-2022 utshele i-FARPost ukuthi abanye abadlali babemhleba ngesiZulu bengazi ukuthi uyaluzwa lolu limi.
“Ukukhuluma iqiniso nje, kwangiphatha kabi lokhu ababekusho,” kusho uNcube.
“Abanye babengithuka ngesiZulu, bengazi ukuthi ngingumNdebele, okuwulimi olucishe lufane nesiZulu.
“Babengithuka ngikhona bethi kumele kube khona ozongilimaza ejimini, ngazizwa ngingelutho.
“Kwakungiphatha kabi lokhu, ngagcina sengizisola ukuthi mhlawumbe bekumele ngihlale ekhaya (eZimbabwe).
“Abanye abadlali babedinwe wukuthi iqembu lisayinise mina, lanqaba ukusayina abangani babo.”
Uthi indlela isimo esasike sishube ngayo, ehletshwa ezwa, wayeze adube ayozilalela engasaqedanga nokudla.
“Kwakukubi ngendlela yokuthi ngangiphoqeleka ukuthi ngishiye etafuleni lokudlela ekhempini izikhawu eziningi ngingakuqedile ukudla.
“Konke lokhu kungenxa yokuthukwa. Yinto eyenza kube nzima kimina ukusebenzisana nabanye babadlali.”
Into eyammhlenga nokho wukuthi umqeqeshi woSuthu ngaleso sikhathi, uBenni McCarthy wayelenza iqiniso.
“Ngiyambonga umqeqeshi uBenni (McCarthy), ngoba wayebona yonke into, indlela engangidonsa kanzima ngayo ukubhekana nesimo.
“Wayengigqugquzela ethi angigxile kulokho okungilethe eNingizimu Afrika ngikhohlwe wokunye.
“Kodwa ukungamukeleki engakuthola kozakwethu kwacishe kwangenza ngayeka.”
FUNDA NALA: UJele uveza okwakhubaza impumelelo kaMokwena kwiBucs
Ngemuva kokuphela kwenkontileka kuMaZulu, uNcube waphindela eZimbabwe lapho esedlala khona kwiSheasham edlala kwiCentral Region Soccer League.
