Ayigculisanga iKaizer Chiefs ishaywa yiYoung Africans eTanzania
Sbongs Gumbi
IKaizer Chiefs isekude ekubeni yiqembu okufanele ukuba umqeqeshi omusha uMolefi Ntseki ufuna ibe yilo ngesizini yakhe yokuqala kulezi zinkunzi zaseSoweto.
Kukhulu okulindelekile nokubekwe emahlombe kaNtseki njengoba enikwe lo msebenzi wokucija elinye lamaqembu amakhulu eNingizimu Afrika.
Ukwehlulwa yiYanga ngo 1-0 eBenjamin Mkapa Stadium ngoMgqibelo ebusuku ngeke kumsize ngalutho uNtseki ekumakheleni ugazi kubalandeli.
Indlela edlale ngayo iKaizer Chiefs kulo mdlalo akuyona ebuyisa ithemba lokuthi ingakwazi ukuvala ihlazo leminyakanyaka lokungabuyi nandebe.
IKaizer Chiefs ibe iwuqale ithembisa lo mdlalo, inokulibamba kahle ibhola kodwa kubuye kuvele ukutatazela bese ililahla kalula.
Beyixakwa nawukuthi iYanga beyihleleke kahle ikhombisa ukuthi iyiqembu elihlangene kahle belidlale imiqhudelwano emikhulu kule minyaka embalwa edlule.
Ngokuqhubeka komdlalo kube lula ukubona ukuthi iChiefs yiqembu elisabunjwa kabusha njengoba iminyakazo yayo beyingahlangani nhlobo.
IYanga beyiliwina kalula kwikaizer Chiefs, bese yakha amathuba angcono futhi ifika kalula emapalini ka-Itumeleng Khune.
UMahlatse Makudubela, osanda kujoyina lezi zinkunzi zaseTanzania, ubengomunye wabadlali abebeyithwalisa uthayela iChiefs.
Igoli leYanga lingene nomnyakazo wokugcina wesiwombe sokuqala ngesikhathi uKennedy Musonda eleqisa phezu kukaKhune ibhola.
UKhune ukhishwe ngesikhathi sekhefu, kwangena uBrandon Petersen. Isheshe yambuza iYanga uPetersen ukuthi ungene nani.
Kuthe emizuzwini engu-10 kuqale isiwombe sesibili, uNtseki wenza izinguquko efaka uSiyethemba Sithebe endaweni kaYusuf Maart.
UNkosingiphile Ngcobo ungene endaweni kaChristian Saile. UNjabulo Ngcobo ungene endaweni kaGiven Msimango kwathi uReeve Frosler wathatha ekaZitha Kwinika. Lezi zinguquko azisizanga kangako ukujika isimo somdlalo njengoba iYanga beyiqhubeka nokuzenzela.
FUNDA NALA: Ubabophele bonke abasha uMolefi Ntseki kowobungani weChiefs
IYanga ibisawaphethe umdlalo futhi yakha amathuba angcono futhi ubengashaya amagoli angaphezulu kwelilodwa kodwa uPetersen wanqaba.
