Insephe yamaBhokobhoko, uBryan Habana, ikhala ngokuqolwa imali uyise
INTATHELI YEMPEMPE
Insephe yebhola lombhoxo, uBryan Habana, seyiveze imfihlo ebingaziwa yokuthi uyise wayiqola imali ngesikhathi eseyimenenja yayo.
UHabana washaya ama-try angu-67 kumaBhokobhoko emidlalweni engu-124, phakathi kuka-2004 no-2016.
Lo mdlali, owayedle ngesivinini esimangalisayo enkundleni, wayeyingxenye yeqembu laseNingizimu Afrika elanqoba iNdebe yoMhlaba ngo-2007.
Ngesikhathi ekhuluma kwiBusiness of Sport Podcast, uHabana ugeqe amagula ngokuthi umuntu ayemthembe kunabo bonke, wamenzela phansi kanjani.
“Ukwethemba yinto enzima kakhulu ukuyiqonda,” kusho uHabana owaqala ukuzakhela igama esadlala kwiBulls.
“Ithemba lami lonke ngangilibeke kubaba wami, okunguyena owayengamele lolo hlangothi (imali) lwempilo yami, kusukela ngisemncane.
“Ngemuva kweminyaka eyisishiyagalombili ngathola ukuthi ithemba engangicabanga ukuthi nginalo, laliyinto engekho.
“Ngebhadi ngalahlekelwa yimali eningi ngenxa yokuthi umuntu oyedwa engangicabanga ukuthi ngingamethemba, wenza ubushompeshompe ngemali, wayisebenzisa ukwenza izinto zakhe, iminyaka eyisishiyagalombili.”
UHabana uthe iqiniso lavela ngesikhathi esuka kwiBulls eya kwiStormers ngo-2009. Yilapho umndeni wakhe wawuzama ukuthenga umuzi eKapa.
“Kwakumele sifake imali yesibambiso yendlu, ngase ngiya kubaba ngathi, ‘lalela, ngidinga ukuthatha imali encane kule yami ebekiwe’.
“Ngesikhathi ngilokhu ngiqhubeka ngicela, imali yayilokhu ingaqhamuki.
“Kwakuyindlu yethu yamaphupho futhi sasingeke sikwazi ukuphuthwa iyona. Ngakho kwakumele ngithole imali eceleni ngoba yayingaqhamuki le engangiyibekile.
“Isikhulu esiphezulu seCanterbury International, sangithumelela i-email sithi, ‘sesikusayinisile iminyaka emihlanu futhi sesikhokhe imali enkulu yokusayina kwakho.’
“Ngashayela ubaba ucingo ngibuza ukuthi iphi imali, wathi akazange athole lutho – kodwa inkontileka yayikhona phambi kwami.
“I-Bryan Habana Trust, lapho ngangithi yonke imali yami yayingena khona, kwakuyi-account yasebhange kababa.
“Ngesikhathi ngimqonda nobufakazi, waphika yonke into. Angitholanga ngisho isenti emalini yeGillette.
Le nsephe ithe yayifisa ukubuyisana noyise ngokuhamba kwesikhathi, kodwa kwagcina kungenzekanga.
“Yinto engangingayikhetha kalula leyo ukube wayezimisele ukungihlangabeza,” kuqhuba uHabana.
“Ngesikhathi ngimnika ithuba lokuthi akhulume iqiniso, lokho akwenzekanga.
“UJanine namadodana ami yibona abalulekile manje kimina.”
