ULesedi Kapinga usesayinwe yizinkunzi zaseSoweto

Usezogijima kwi-Orlando Pirates umdlali oshiye komacaphuna kusale iMamelodi Sundowns uLesedi Kapinga.

Lezi zindaba zokusayina kukaLesedi Kapinga kwiPirates ziqinisekiswe yilo leli qembu ngoLwesibili ekuseni.

“I-Orlando Pirates iyakuthokozela ukumemezela ukusayinwa kukaLesedi Kapinga ngaphambi kwesizini ka-2023/24,” kusho leli qembu.

“Lo mdlali oneminyaka engu-28, osanda kudlala kwiBafana Bafana ngesikhathi seCosafa Cup, usayine inkontileka yeminyaka emithathu.”

UKapinga, obesanda kuveza ukuthi uzocabangisisa ngaphambi kokuqoka iqembu azoya kulo kulokhu, useveze injabulo yakhe ngokuba yiBhakabhaka.

“Ngiyajabula ukujoyina leli qembu,” kusho uLesedi Kapinga. “Angiyena umuntu okhuluma kakhulu ngoba ukukhuluma kulula.

“Engigxile kukho wukuthi ngiqale ukuzilolonga bese ngibuyela ekwenzeni ijnto engiyithandayo (ukudlala ibhola.”

ULesedi Kapinga uqale ukuvelela ebholeni lakuleli ngesikhathi edlala kwiBlack Leopards nokuyilapho aheha khona amaqembu amaningi.

Nokho watholwa yiSundowns kodwa wafika izinto azangahamba ngendlela ayefisa ngayo njengoba egcine elizwa ngendaba ijezi kulezi zinkunsi zasePitori.

Ngokusho kwePirates, uKapinga uzohlangana nozakwabo abasha kuleli viki kanti uzogqika unombolo 21.

Ukufika kwakhe kwiPirates kwengeza kubadlali abasezingeni eliphezulu evele ihlome ngabo njengoba ivivela isizini ezoba ngenkulu kuyo.

Phela kubhekwe lukhulu kuleli qembu njengoba likhombise ukuba yingozi ngesizini edlule liwina izindebe ezimbili.

Kulokhu libhekiwe ekutheni liqede umbuso weSundowns kwiDStv Premiership bese lenza kahle nakwiCaf Champions League.

Kubadlali abasha kwiPirates, uKapinga wengeza phezu kukaPatrick Maswanganyi obekwiSuperSport United.