IBafana ‘isihlazile’ ihluleka ukuswenkela i-Afcon
Amaqembu asuka emazweni ehlukene aya kwi-Africa Cup of Nations ese-Ivory Coast afike egqoke ngendlela ehehayo, eqhakambisa isiko nomswenko wakuleli lizwe.
Kusukela kwiGhana, abadlali bayo abebembethe amabhayi kanokusho okuyindlela yesintu yokugqoka kuyo, amazwe abeswenkile.
Nokho elakuleli, elicijwa uHugo Broos lihambe lizigqokele izimpahla zabaxhasi iLe Coq Sportif.
Abalandeli bakhalileke ezinkundleni zokuxhumana ngalokhu kusalela emuva ezintweni, bethi iBafana ngathi beyiziyela ejimini nje.
Abanye bathe bekuyithuba lokuthi nayo ikhangise ngengqephu yakuleli, kubonakale ukuthi nathi sinaso isitayela sokuswenka ngesintu.
Kuthiwe ibingagqoka noma ke ilamabhulukwe abizwa ngemibhlaselo okungenani.
Umsakazi woKhozi FM, uNolwazi Machi uthe inselelo ngeNingizimu Afrika wukuthi sinamasiko ahlukene.
“Thina lapha sinezizwe ezihlukene ngakho akulula ukuthi sibe nendlela eyodwa yokugqoka esingathi eyethu njengesizwe,” kusho le ntokazi.
Uthe mhalwumbe indlela ebingenziwa wukuthi umdlali ngamunye avuunyelwe ukugqoka ngendlela ekhombisa isintu sakubo.
“UMzulu agqoke ibheshu lakhe, nabanye bagqoke okwangakubo ukukhombisa ukuthi nebala siyiRainbow Nation.”
Uthe uchazekile ngendlela abadlali baseGhana abebegqoke ngayo, wathi kumenze wabafisela impumelelo kulo mqhudelwano.
Intokazi esencane, uNosipho Hadebe, owethula ezemidlalo esiteshini esizimele saseMpumalanga, iRise FM yena uthe kumethusile okwenziwe yiBafana.
“Kuthusile ukuthi iBafana ingenzi njengamanye amaqembu afana noGhana noTunisia…
“Bona bafike bezigqokele ama-track suit nje,” kusho le ntokazi edabuka eNanda kodwa esizinze eNelspruit.
“Amanye amazwe afike ehlobe ngomswenko oqhakambisa ukuzigqaja ngobubona.
“Bebekhombisa uthando lwamazwe abaqhamuka kuwo. Lokhu kweBafana kwenze yabonakala njengabantu abangazigqaji ngezwe abaqhamuka kulo.”
IBafana izihlazile ezwenikazi – ngathi iya ejimini nje
Umsakazi weJozi FM, uThemba Shabalala yena uthe iNingizimu Afrika izihlazile ngalokhu okwenzekile.
“Indaba engike ngayiqaphhela ngale Afcon ukuthi amaqembu afike egqoke izimpahla zabo ngokobuzwe.
“Sibone nobhuti bakwa-Ayew beGhana befika bedlubhe izimpahla zabo zaseGhana.
“NoRichard Ofori wakuleli – ngithi owakuleli ngoba udlala khona lapha ekhaya (kwi-Orlando Pirates) – bebahle behlobe ngezimpahla zabo.
“Nasezinkundleni zokuxhumana amaqembu ahlukene uyawabona ekhombisa izimpahla zawo ezehlukene ezinhle.
“Okungixakile wukuthi iNingizimu Afrika – izwe elikhulu kangaka futhi elihlonishwayo emhlabeni jikelele…
“Izwe eliphethe iCaf njengamanje – umengameli weCaf uPatrice Motsepe owakuleli. Kodw aiqembu lethu lifika sengathi liziyela ejimini nje.
“Akuhlalanga kahle kimi. Sibe yinhlekisa ngoba phela uma ubuka amanye amaqembu, uma engagqokile umswenko wezwe, bebegqoke amasudi.
FUNDA NALA: Babonga uMdali ngokusinda engozini yendiza abe-The Gambia
“Thina sifike singathi siziyela ejimini, okuyinto eyenza sithatheke kancane,” kuchaza umfokaMshengu.
