UJohn Maduka ucacisa ekaZungu obonakale kwiRoyal AM

July 25, 2023 Admin 4011 Views

Njabulo Shezi

Umqeqeshi weRoyal AM uJohn Maduka useveze izizathu zokubonakala kobuso obusha eqenjini lakhe yize libhekene nesigwebo esibi seFifa.

Leli qembu likaJohn Maduka belibophele abadlali abasha ngesikhathi lidlala kwiKZN Premier’s Cup ngempelasonto kubo obekukhona noNkanyiso Zungu.

IRoyal AM beyiyingxenye yalo mqhudelwano obudlalelwa ezinkundleni ezihlukene eThekwini ngempelasonto. Ihlulwe AmaZulu agcine ewunqobile lo mqhudelwano.

Leli qembu likaShauwn Mkhize belibophele abadlali abasha abangaphezu kwabathathu okukhona kubo nabebedlala eqenjini lalo leDStv Diski Challenge.

Nokho ogqame kakhulu ngowayengumdlali wasesiswini we-Orlando Pirates uNkanyiso Zungu ozilolonga naleli qembu kusukela echithwe yilezi zinkunzi zaseSoweto.

UZungu ubebolekiswe kwiRichards Bay FC ngesizini edlule, kodwa nayo yamchitha ngoba ikhala ngokuthi akaziphethe kahle.

NoSibusiso Sibeko obekwiMarumo Gallants, benoMxolisi Mkhonto waseSwatini abasahlolwa kwiRoyal AM nabo badlalile.

Nokho ngokusho kukaJohn Maduka laba badlali sebeyingxenye yeRoyal AM, akukho ukuthi basahlolwa.

“Iningi labadlali obabone bedlala, abanye babo baqhamuka eqenjini lethu leDStv Diski Challenge,” kusho uMaduka.

“Asinabo abadlali abahlolwyao lapha. Bonke bayingxenye yeqembu, yingakho ubabonile bedlala namuhla.”

Lapho ebuzwa ukuthi acacise ukuthi sebeziqedisile yini izinkontileka nabadlali, uthe, “Sizokwethula konke maduze.”

Nokho iRoyal AM isalengelwa yisigwebo sokuthi ingasayini abadlali kuze kube ikhokhela uSamir Nurkovic yonke imali emkweleta yona.

Lesi sigwebo yasithweswa yiFifa. Kodwa yona yabe seyilidlulisela kwiCourt of Arbitration for Sport (Cas) leli cala nala ethi sihoxisiwe khona lesi sigwebo kuze kube kuphothulwa icala.

IRoyal AM iyadinga ukuqinisa njengoba ilahlekelwe abadlali abanamava okukhona kubo uTebogo Potsane osanda kusayina kwiKaizer Chiefs.

Ivele ke nayo isanda kudedela oRicardo Nascimento, Lantshene Phalane noTshepo Rikhotso.