IPirates izoqala ngelaseComoros kwiCaf Champions League
Njabulo Shezi
I-Orlando Pirates izobhekana neDjabal Club yaseComoros emzuliswaneni wokuqala wokuhlunga kwiCaf Champions League.
Lokhu kuvele ngesikhathi kuqhathwa amaqembu azodlala imiqhudelwano yeCaf kule sizini eCairo, e-Egypt ngoLwesibili.
Uma iBhakabhaka, eladla le ndebe ngo-1995, linganqoba kulowo mzuliswano lizobhekana nozonqoba umdlalo phakathi kweJwaneng Galaxy yaseBotswana neVipers SC yase-Uganda emzuliswaneni wesibili.
IGalaxy icijwa ngumqeqeshi wakuleli uMorena Ramoreboli obehola iBafana Bafana kwiCosafa Cup yakamuva.
Amaqembu aphumelele emzuliswaneni wesibili azobe esengena esigabeni samaqoqo kwiCaf Champions League ka-2023-24 la kuzobe sekunamaqembu angu-16 kuphela.
IMamelodi Sundowns, enqobe le ndebe ngo-2016 ayizudlala emzuliswaneni wokuqala.
ISundowns izobhekana nowine phakathi kweBendji yaseGabon neBumamuru yaseBurkina Faso emzuliswaneni wesibili.
ISundowns izongena esigabeni samaqoqo kwiCaf Champions League okwesishiyagalombili kulandelana uma iwunqoba lowo mdlalo.
Leli qembu lasePitoli, elihlulwe kabuhlungu kowandulela owamanqamu yizinkunzi zaseMorocco, iWydad Athletic ngesizini edlule, kubhekwe zenze kangcono kulokhu.
Iqembu laseNingizimu Afrika elizobe lidlala okokuqala kwiCaf Confederation Cup, iSekhukhune United, izobhekana neYoung Buffaloes yase-Eswatini emzuliswaneni wokuqala.
Uma inqoba iyobe seyibhekana neSt Eloi Lupopo yaseDR Congo emzuliswaneni wesibili. ISuperSport United, nayo ezodlala kwiConfederation Cup, ngeke ingene emzuliswaneni wokuqala.
Izolinda abazonqoba phakathi kweGaborone United yaseBotswana ne-ASSM Elgeco Plus yaseMadagascar esigabeni esilandelayo.
FUNDA NALA: Vilakazi: IMaritzburg igejile kuZipho Dlangalala ‘oxoshwa njalo’
Imidlalo yomlenze wokuqala wale midlalo kuyo yomibili imiqhudelwano izodlalwa ngo-Agasti 18 kuya ku-19 bese owesibili udlalwe ngo-Agasti 25 kuya ku-26.
