Isiphinde yasika omunye umdlali osezingeni iPirates

Alfred Ngubane

I-Orlando Pirates isigcine imtholile uKarim Kimvuidi ongumgadli osemncane othembisayo obegijima wiMaritzburg United ngesizini edlule. 

Lo mdlali uke wakhuluma neMpempe ngempelasonto wathi uma kungamlungeli phesheya la inhliziyo yakhe seyikhona, uzokhalela kwiPirates.

UKarim Kimvuidi ngomunye  wabadlali abadlala ibhola elisezingeni eliphezulu njengoba ehehe amehlo amaqembu amaningi ngesikhathi ekwiMaritzburg. 

“Kuyinjabulo kwi-Orlando Pirates ukumemezela ukuthi seyivumelene neMaritzburg United ngokuthola uKarim Kimvuidi,” lisho kanje leli qembu lethula lo mdlali. 

UKiMvuidi ulandele abadlali abadala baseDR Congo abagqama kwiPirates abanjengo Jento Kambara, Etienne Mvumbi Nsunda, Patrick  Kazadi, Lelo Mbele noMwamba Musasa. 

IPirates inobudlelwano obuhle bokuthengiselana abadlali neMaritzburg njengoba uKarim Kimvuidi elandela koBandile Shandu, Siphesihle Ndlovu, Fortune Makaringe noRichard  Ofori. 

Uzolisebenzela kanzima ke nokho ijezi kwiPirates lo mdlali kwazise ibophele abadlali bahle kuzo zonke izindawo. 

FUNDA NALA: Vilakazi: IMaritzburg igejile kuZipho Dlangalala ‘oxoshwa njalo’ 

Ufika nje usezithendeni zikaLesedi Kapinga osayinwe yiPirates ngoMsombuluko esuka kwiMamelodi Sundowns.