‘Uvukile umalambane’ i-Arrows ithola abaxhasi

Intatheli yeMpempe

ILamontville Golden Arrows imemezele abaxhasi bayo abasha okungokokuqala ngemuva kweminyakanyaka ingenabo. 

Abafana Bes’thende bebethwale kanzima isikhathi eside ukuthola abaxhasi, kodwa ngoLwesine imangaze abaningi seyethula ukuthi izosebenzisana nenkampani yokubheja i-10Bet. 

I-Arrows ibinomcimbi oyisipesheli eMoses Mabhida Stadium okuyilapho kwethulwe khona laba baxhasi. Eminye imininingwane ngalaba baxhasi ibingakaveli.

Isivumelwano sabo esokusebenzisana iminyaka emithathu. I-Arrows yayigcine ukuxhaswa yiMTN kudala. 

Ubudelwano bayo neMTN baphela ekupheleni kwesizini ka-2012/13 kanti kusukela ngaleso sikhathi belilokhu lingenabo abaxhasi.

Leli qembu elizinze KwaZulu-Natal lizogqoka ijezi lalo elisha elinelogo yale nkampani elixhasile emdlalweni walo wokuqala weDStv Premiership. 

FUNDA NALA: ISuperSport icathamela Usuthu ngestina ngomdlali weBafana

Izobhekana neMoroka Swallows enkundleni yayo entsha yasekhaya, iMpumalanga Stadium eseHammarsdale ngo-Agast 5.