UPablo Franco usakhala ngobuthuntu phambili kuMaZulu
Sbongs Gumbi
Uqeqeshi waMaZulu FC, uPablo Franco ufuna abadlali bakhe bathi ukuqina ngokomqondo, bengagqilazwa yizimo uma zingahambisani nabo emdlalweni.
Ukuveze lokhu kulandela ukuthi AmaZulu ehlulwe kowamanqamu kwiPrince Mangosuthu Legacy Cup yeRoyal AM ngoMgqibelo.
Iqembu likaPablo Franco lizithole lingasaphelele enkundleni kusaphele imizuzu engu-32 emdlalweni wamanqamu obusoLundi, enyakatho yeKwaZulu-Natal.
USiphesihle Maduna ukhishwe ngekhadi elibomvu. Usuthu beluvele selulandela ngemuva ngo 1-0 ngaleso sikhathi kanti alukwazanga ukubuya ngemuva kwalokho.
“Namuhla emdlalweni owandulela owamanqamu nowamanqamu, ukudlala ibhola bekunzima…
“Lokhu bekungenxa yesemo senkundla, nomoya,” kusho uPablo Franco ngemuva komdlalo.
“Sizamile kowandulela owamanqamu, sawulawula umdlalo. Kowamanqamu, sidlale kahle imizuzu engu-25 kuphela.
“Ngemuva kwalokho, ngenxa yokuthi bese sishoda ngomdlali oyedwa, asikwazanga ukudlala futhi ngicabanga ukuthi kunezinto ebholeni abaqeqeshi nabadlali abangakwazi ukuzilawula.
“Futhi ngezinye izikhathi lezo zinto ziyakulimaza. Kodwa udinga ukuqina, udinga ukuqhubeka nokuzama futhi uqhubeke nokudlala,” kwengeza lo mqeqeshi waseSpain.
UPablo Franco nokho ubona ukuthi iqembu lakhe kufanele likwazi ukudlala nangaphansi kwezimo ezingezinhle, futhi lizame ukunqoba.
“Okungamukelekile wukuthi umdlali oyedwa athole ikhadi elibomvu bese kulimaza iqembu lonke. Ukusuka lapho umdlalo ubusuka kolunye uhlangothi uye kolunye – bebezama ukusihlasela ngokuzuma.
“Bebezama ukusibamba ngokuzuma, nathi besizama ukubahlasela… Kodwa into okumele siyincome ngeqembu lethu wukuthi liyalwa.”
Ukuqedela amathuba kuseyinkinga enkulu kaFranco kuMaZulu. Kanti njengoba kunamahlebezi okuthi omunye wabagadli bakhe abasezingeni eliphezulu uGabadinho Mhango uyahamba, kuzomele athole isixazululo esisheshayo.
“Asenzanga kahle uma sesisondela epalini labo… Kodwa okungenani ukuzimisela nenhloso kukhona,” kwengeza lo mqeqeshi oteketiswa ngelikaCijimpi.
FUNDA NALA: UNtseki uzowalungisa amaphutha aqhathe iKaizer Chiefs nenduku
AmaZulu azoqala imidlalo yeDStv Premiership ngayo iRoyal AM ekuhambeni eHarry Gwala Stadium, eMgungundlovu ngoMgqibelo ntambama.
