Izovusa ibhubesi ebelilele iMvelo Boxing
Alfred Ngubane
Izobuyisela uThabiso “The Rock” Mchunu eriningi ngemuva kwesikhathi eside agcina iMvelo Boxing Promotions kaNomvelo Magcaba-Shezi.
Lo mhleli qezimpi uthi usevele uphezu kwawo amalungiselelo alempi okubhekwe ihehe inqwaba yabalandeli kwazise kade bagcina ukubona uThabiso eringini.
Futhi kuzobe kungokokuqala kusukela angena esibhakeleni esikhokhelayo elwela eMgungundlovu okuyila aqala khona ukuzakhela igama kwezamankomane.
Le mpi ihlelelwe uDisemba 1 ehholo lomphakathi lasedolobheni laseMgungundlovu, ngokusho kwale ntokazi ephethe iMvelo Boxing.
“Ngifuna ukubheka imbangi yaphesheya kwezilwandle ezolwa noThabiso,” kusho uNomvelo. “Engingakusho nokho wukuthi uThabiso usazomukluza amabhokisa.
“Usakulambele namanje ukunqoba izicoco zomhlaba ezinhlanu ngaphambi kokuthi abeke amagilavu akhe ethala.”
UNomvelo uphinde waveza ukuthi ngeke esagcina ngokuba ngumhleli wezimpi nje kuphela kodwa useqala esakhe isitebela la ezozicijela khona amabhokisa.
Useqalile ukusayina amabhokisa ngaphansi kweMvelo Boxing Promotions njengoba esethole ijimu abazozicija futhi bakhempe kuyo uma bezoba nezimpi.
Lesi sitayela saqalwa yinkunzi kwezamankomane kuleli uMzimasi Mnguni ongasekho kanti eKZN safika noThulani Magudulela naye ongasekho.
UNomvelo ubonakala ekhula kakhulu esibhakeleni njengobabe esanda kuhlonishwa nangumnyango wezemidlalo kuzwelonke ngendondo yokuba ngumhleli wezimpi ohamba phambili nothuthukayo.
Le ntokazi, nayo eke yaba ngumshayisibhakela isencane ijima ngaphansi kukamalume wayo u-Alex Mchunu, ithi lukhulu eseza nalo kulo mdlalo.
Izimpi zakhe ziheha abalandeli abaningi njengoba eseqoke ukuziqhathela eMgungundlovu okuyindawo ebinendlala yezimpi zesibhakela phambilini.
FUNDA NALA: UMorgan Mammila uzibeka ezingeni likaBenni McCarthy
IMvelo Boxing isanda kufeza nesifiso sikaMoruti “Babyface” Mthalane sokulwela ngasekhaya njengoba emqhathe khona eMgungundlovu ngaphambi kokuthi athathe umhlalaphansi.
