Unqotshwe iStellenbosch umbango wesikhwishikhwishi seChiefs
Njabulo Shezi
IStellenbosch FC isigcine imtholile umdlali ebimfuna ngabomvu futhi imbanga namanye amaqembu, uKgaogelo Sekgota obekwiKaizer Chiefs.
Lokhu kufeze isifiso somqeqeshi weStellies, uSteve Barker ubemagange ukuletha lo mdlali eqenjini lakhe ngaphambi kokuqala kwemidlalo yeDStv Premiership ngempelasonto.
Ngokubika kwabeSABC Sport, uSekgota angase abonakale okokuqala kwiStellies uma seyibhekene ne-Orlando Pirates eDanie Craven Stadium ngoMgqibelo.
Lokhu kulandela ukuphothulwa kwezingxoxo phakathi kweChiefs neStellenbosch okuke kwabukeka sengathi zifike kwangqingetshe.
Kodwa ngokuphikelela kukaBarker, ugcine ekutholile lokhu abekufuna. IStellenbosch ibicinga umdlali osezingeni ezoqinisa ngaye.
Lokhu bekulandela ukudaya kwayo uJunior Mendieta kwiMamelodi Sundowns. Amehlo kaBarker kubikwa ukuthi abethe njo kuSekgota.
IChiefs bengakulindele nokho ivume ukudedela lo mdlali ngoba bekungekho okukhombisa ukuthi akekho ezinhlelweni zeqembu.
Ngakho-ke, kulandela izingxoxo phakathi kwezinhlangothi ezithintekayo, kugcine kuvunyelwene.
Ukuthathwa kukaSekgota iStellenbosch kuvela ukuthi kushiye uGavin Hunt weSuperSport United ekhexile ngoba naye ubemhalela lo mdlali.
UHunt nguye owalanda lo mdlali phesheya ngesikhathi esaqeqesha iBidvest Wits futhi wayekhona bewina isicoco seligi ngaphambi kokuhlakazwa kwaleli qembu.
Lo mdlali oneminyaka engu-26, futhi oke wadlala isikhashana eBelgium, ubesesonyakeni wakhe wokugcina kwinkontileka yakhe yeminyaka emithathu neChiefs.
Mhlawumbe yikho lokhu okwenze yabona kungcono imdayise uma kuvela abamfunayo ngoba vele ubezohamba mahhala ekupheleni kwesizini.
ISABC Sport iphinde yabika ukuthi neMoroka Swallows izamile ukumbuyisa lo mdlali obesemabhukwini ayo ngesizini ka-2020/21.
FUNDA NALA: OwoSuthu ucacisa ngoGabadinho Mhango ‘obheke kwiChiefs’
USekgota ubengekho ngesikhathi Amakhosi eseBotswana la abedlala khona umdlalo wobungani neTownship Rollers ngempelasonto.
