UKhomphela uzoyivuselela iSwallows, kusho u-Erick Ramasike
Alfred Ngubane
U-Eric “Dambai” Ramasike, oyinkakha yeMoroka Swallows neMamelodi Sundowns, ubona uSteve Komphela ewufanele lo msebenzi wakamuva anikwe.
Ukholwa ukuthi uKomphela, ongumqeqeshi omusha weSwallows uzoyihlanganisa, ayenze iqembu elizogila izimanga kule sizini ezayo.
Uthi njengoba ebophele abadlali abadala nabasebancane futhi abazimiselayo, unazo izithako zempumelelo.
ISwallows isayine abadlali abanamava aziwayo ebholeni lakuleli oAndile Jali noDumisani Zuma ukwengeza kwebivele inabo.
U-Erick Ramasike ulindele uJali abe ngumholi oqotho kuleli qembu njengoba esekhulile nje.
Uthi noKomphela uke wasebenza emaqenjini acishe abe sesimweni esifanayo seSwallows ngaphambilini futhi wawaqinisa.
“Uke wasebenza kwiFree State Stars, Golden Arrows neMaritzburg United,” kusho u-Erick Ramasike.
“Okuhle wukuthi useke wasebenza nasemaqenjini amakhulu, iKaizer Chiefs neMamelodi Sundowns ngakho wazi izimo zakuzo zonke izindawo.
“Ukuhamba kwakhe kwiSundows kube nezinsolo zokuthi ubengasezwene kahle noRulani Mokwena (umqeqeshi weSundowns abeyiphini lakhe).
“Lokhu kuzomenza abe yingozi enkulu emqenjini amakhulu ikakhulukazi iSundowns… “Kodwa naye unengcindezi yokuthi sekuzomele azibonakalise ukuthi uphetheni entsha ebholeni lakuleli ayifunde kulesi sikhathi ekwiSundowns.”
Kuzokhumbuleka ukuthi iSwallows ngonyaka odlule iyiqale kabi isizini kodwa yaguqula amatafula ngasekugcineni njengoba igcine iqede emaqenjini ayishiyagalombili aphezulu kwilogi.
“Kuzomele nabaphathi beSwallows bangawenzi amaphutha abawenzile kumasizini edlule la bekubuye kube nabadlali abangaholile.”
FUNDA NALA: UMolefi Ntseki ubambe wayeka ebuzwa ngabamataniswa neChiefs
U-Eric Ramasike waduma kuyo iSwallows FC ngezikhathi egijima nabadlali abafana no-Andries “Chaka-Chaka” Mpondo, Joseph “Manelo” Rapelego, SteveSekano nabanye.
