Uxhaso lwenkampani yaphesheya kwiMamelodi Sundowns
Njabulo Shezi
IMamelodi Sundowns ingase ithole abaxhasi abasha enkampani yamazwe ngamazwe esebenzisana namanye amaqembu emhlabeni jikelele.
Leli qembu lasePitori yilo elinempumelelo ebonakalayo kuleli kule minyaka eyishumi edlule.
Ngesikhathi inqoba isicoco seDStv Premiership ngesizini edlule, bese kungokwesithupha kulandelana.
Eminyakeni emibili edlule, iMamelodi Sundowns isayine isivumelwano sokusebenzisana neRoc Nation Sports okuyinkampani yomculi wase-USA, uJay-Z.
Umsebenzi wale nkampani wukutholela iMamelodi Sundowns amathuba okukhula ngezindlela ezihlukene.
Kukholakala ukuthi yiyo iRoc Nation Sports etholele leli qembu laba baxhasi okuthiwa bangase bathulwe kuleli viki elizzayo.
Ngokubika kwabeFAR Post, imibandela yesivumelwano nabaxhasi abasha ayikadalulwa, kodwa kuvela ukuthi yiRed Bull.
IMamelodi Sundowns ivele isebenzisana nenye inkampani yamazwe ngamazwe iHerbalife Nutrition, eyeseka ikilabhu ngezinhlobonhlobo zokudla okunomsoco.
Ukuthola uxhaso lweRed Bull kungaba yinto enkulu kakhulu kwiMamelodi Sundowns.
Lezi zinkunzi zaseTshwane ziya ngokukhula futhi seziqalile ukuba yiqembu elihlonishwayo ezwenikazi lonke.
IRed Bull iyinkampani yeyaziwa emhlabeni jikelele futhi inawo amaqembu esebenzisana nawo emidlalweni ehlukene.
Kuleyo midlalo kukhona iFormula One, Formula E, neRed Bull Racing.
IRed Bull iphinde ibe namaqembu amane ebhola ayingxenye yayo.
Amaqembu ebhola yilawa:
- I-FC Red Bull Salzburg – Bundesliga, Austria
- New York Red Bulls – MLS, USA
- I-RB Leipzig – Bundesliga, Germany
- I-Red Bull Bragantino – Série A, Brazil
Uxhaso lweMamelodi Sundowns kuzoba ngokokuqala ebholeni laseNingizimu Afrika.
FUNDA NALA: Okuhle nokubi okubonwe uNtseki kowokuqala weChiefs
Le nkampani ike yaxhasa umqhudelwano owaziwa ngeRed Bull Kasi Cup, ngenhloso yokuqhakambisa ibhola elisafufusa eNingizimu Afrika.
Nokho, isivumelwano neSundowns sizophinde sikhulise ukuqwashisa ngomkhiqizo wayo ezweni.
