ISafa ifuna inkundla enkulu eNorthern Cape
Inhlangano eyengamele ibhola kuleli, iSouth African Football Association (Safa), isezinhlelweni zokunxenxa uhulumeni waseNorthern Cape ukuba wakhe inkundla yezemidlalo esezingeni lomhlaba.
Umengameli weSafa, uDanny Jordaan uveze ukuthi usanda kuba nimhlangano nongqongqoshe wezemidlalo, uZizi Kodwa ngalolu daba.
INorthern Cape inamaqembu amabili adlala ezigabeni zePremier Soccer League njengoba ine-Upington City neHungry Lions kwiMotsepe Foundation Championship.
Ibhola likhomba ukudlondlobala kulesi sifundazwe njengoba amaqembu esegaba se-ABC Motsepe League esenokukhonya emidlalweni yokuhlunga.
Inawo nadlala esigabeni sabesifazane iHollywoodbets Super League kanti nawo abukeka eza kahle.
Ngaphandla kwebhola, lesi sifundazwe siqinile nakwezokusubatha njengoba sinabagijimi abazakhela igama kulo mdlalo.
INorthern Cape yisona kuphela isifundazwe kuleli esingenayo inkundla yezemidlalo esezingeni lemidlalo yeFifa.
“Uzobona ukuthi eNorthern Cape sinamaqembu amabili akhokhelwayo khona iHungry Lions ne-Upington City,” kusho uJordaan.
“Lawa ngamaqembu amabili okugcina akhushulelwe kwiNational First Division (NFD) futhi siyethemba ukuthi azowaqinisa lawo maqembu aphinde akhushulelwe.
“Ngaphezu kwalokho sixoxisane nohulumeni waseNorthern Cape mayelana nokwakhiwa kwenkundla ngoba abanayo inkundla ehambisana nemigomo yamazwe ngamazwe.
“Ngeke sikwazi ukudlala ibhola laphesheya khona ngaphandle kokuthi silusukumele lolu daba.
FUNDA NALA: IZambia FA ichitha ezokushona kukaKalaba
“Sizoba neminye imihlangano nohulumeni ukuze sigcizelele ukubaluleka kokuthi okungenani sibe nenkundla yeCaf neFifa ezosingatha imidlalo yamazwe ngamazwe.”
