Ithole ‘inkosi yezinyosi’ kuThapelo Maseko iSundowns – Ramasike
Alfred Ngubane
U-Eric Ramasike, owayeyingqwele enofakazi kwiMamelodi Sundowns, uthi leli qembu libambe ufishi omkhulu ngokusayina uThapelo Maseko.
ISundowns isayine uThapelo Maseko ‘enkulisa yayo’ iSuperSport United emavikini ambalwa eldule kanti lo mdlali ujabulise kakhulu uRamasike.
Uthi iSundowns ibambe inkosi yezinyosi ngalo mdlali wasesiswini oyinxele obeyiphela endlebeni kubadlali basemuva ngesizini edlule.
URamasike uthi kuzomele uRulani Mokwena amnike ithuba ngokwanele lo mdlali ngoba kukhona into ehlukile eza nayo.
“Nokho kuzomele bamtshele ukuthi akasebenze kakhulu kunakuqala,” kusho le nkakha eyadlala nakwiMoroka Swallows ngezikhathi zayo.
“Lo mdlali uqale ukuzibonakalisa kwiSuperSport la edlale khona ngokukhulu ukuzikhandla.
“Abadlali basemuva kade behlale besenkingeni enkulu ngaye,” kuqhuba uRamasike owayengomunye wabadlali ababengaconsi phansi kubalandeli.
UThapelo Maseko ulandele abadlali abafana noTeboho Mokoena, Sipho Mbule no-Aubrey Modiba abasuke kwiSuperSport baya kwiSundowns kule minyaka embalwa edlule.
La maqembu asePitoli anobuhlobo obuhle kakhulu kodwa abalandeli bamanye amaqembu banokuwachukuluza bathi iSuperSport yenziwa inkulisa yeSundowns.
UThapelo Maseko ungomunye wabadlali abazodlala kwiCaf Champions League okokuqala kule sizini. Kubhekwe ngabomvu ukubona ukuthi uhlangana kanjani noThemba Zwane, Neo Maema nabanye.
Kubhekwe ngabomvu ke nokuthi iSundowns izoqhubeka yini nomtalabho esiwuvulele iminyaka emaqenjini eDStv Premiership njengoba iqala isizini entsha ngoLwesihlanu.
FUNDA NALA: I-PSL seyibalule izinkundla zeyeMTN8 noweSudnowns neChiefs
ISundowns izodlala ekuhambeni ePeter Mokaba Stadium neSekhukhune United ngoLwesihlanu kusihlwa. Umdlalo uqala ngo-7.30pm.
