Uzama itoho kwiRoyal AM umdlali owaduma kwi-Orlando Pirates
Alfred Ngubane
UXola Mlambo, owaduma kakhulu edlala kwi-Orlando Pirates ujima neRoyal AM ngenhloso yokuzitholela itoho kuyo.
Lokhu kulandela ukuthi ededelwe yiTS Galaxy ekupheleni kwesizini edlule. Ubefike kuleli qembu likaTim Sukazi esuka kuMaZulu FC.
Wayengomunye wabadlali abadlala indima enkulu kuMaZulu ngesikhathi eqeqeshwa uBenni McCarthy, eqeda endaweni yesibili kwiDStv Premiership.
Kodwa izinto azimhambelanga kahle sekushiye uMcCarthy njengoba Usuthu lwabadedela nozakwabo ayesuka nabo kwi-Orlando Pirates oLuvuyo Memela no-Augustine Mulenga.
UMemela noMulenga sebephinde bahlangana eqenjini elilodwa njengoba sebedlala kwiChippa United.
Nokho ukusayinwa kukaMlambo kuncike kakhulu ekutheni iRoyal AM iyayikhokha yini imali eyikweleta uSamir Nurkovic.
Leli qembu livaliwe, ngokomyalelo weFifa, ukusayina abadlali kuze kube liyikhokha iphelele imali ebalelwa kuR12-million eliyikweleta lo mgadli.
Imkweleta nje yingoba yamxosha ngendlela engafanele ngesizini edlule, wabe eseyoyiceba kwiFifa, nebula yahambisana naye.
FUNDA NALA: Izindaba ezibuhlungu kwiChiefs uPule Mmodi eshonelwa ngunina
IRoyal AM yazama ukuludlulisela enkantolo ephezulu yamacala ebhola, iCourt of Arbitration for Sport (Cas) lolu daba kodwa yayichitha.
