Izindaba ezibuhlungu kwiChiefs uPule Mmodi eshonelwa ngunina

Sbongs Gumbi

Esigamekweni esibuhlungu sakamuva, iKaizer Chiefs ithole izindaba ezibuhlungu zokudlula emhlabeni kukanina kaPule Mmodi ngoLwesihlanu.

Ngenxa yalokho, lo mdlali osanda kusayiniswa unikezwe ikhefu futhi wakhululwa ekhempini yeqembu ukuze ayoba nomndeni.

UPule Mmodi ubesanda kujoyina iChiefs esuka kwiGolden Arrows ngoJulayi kanti ubezimisele ukudlala okokuqala emdlalweni wabo olandelayo weDStv Premiership.

Njengoba iqembu lilungiselela ukubhekana neChippa United eMoses Mabhida Stadium eThekwini ngeSonto, izindaba zokushonelwa kukaMmodi zidunge injabulo eqenjini.

Udaba lokudlula kukanina kaPule Mmodi ludalulwe yiChiefs edlulise amazwi enduduzo kuMmodi, umndeni wakhe nabangani ngesitatimende.

“Umndeni weKaizer Chiefs uyadabuka ukumemezela ukudlula emhlabeni kukaBasetsana Lillian Mmodi (umama kaPule Mmodi) ngemuva kokugula.

“Sidlulisa amazwi enduduzo ngalesi sikhathi sosizi kuPule, umndeni wakhe nabangani,” sifundeka kanje isitatimende seqembu.

Njengesenzo sokuqonda nokweseka umdlali wayo kulesi sikhathi esinzima, abaphathi beqembu baqinisekise ukuthi uMmodi uthola uzwelo nosizo aludingayo.

Ngaleyo ndlela ngeke abe khona uma iChiefs seyibhekene neChippa United emdllaweni weDStv Premiership kule mpelasonto.

Lezi zindaba ziwuthinte kakhulu umphakathi webhola kulelii, futhi abalandeli bamaqembu ehlukene bazwakalise ukuzwelana noMmodi kanye neChiefs kulesi sikhathi esinzima.

FUNDA NALA: I-Orlando Pirates ishaye eseSundowns ngabadlali ebabolekisile

Impempe nayo ithatha leli thuba ukufisela uMmodi nomndeni ukududuzeka kulesi sikhathi esinzima.