Utatazeliswa yiSuperSport ‘ehlangene kahle’ owoSuthu
Alfred Ngubane
Umqeqeshi waMaZulu FC, uPablo Martin ungenwa ngamanzi emadolweni ngomdlalo abazowudlala neSuperSport United.
UMartin uthi iSuperSport kudala ihlangene uma iqhathaniswa neqembu lakhe elisahlanganisa njengoba lidedele abadlali abaningi.
Usuthu lusayine abadlali abaningi abasha njengoba lakha kabusha nje. UMartin naye musha ngokwakhe.
Uthi njengoba besebasha nje ebholeni lakuleli akukuningi abakwaziyo.
Lo mqeqeshi uphinde wavuma nokuthi kumshayile ngempela ungasitholi esanele sokuzilungiselela isizini.
Kodwa uzogadla ngakwaziyo manje. AmaZulu azodlala umdlalo wesibili weligi ekhaya eMoses Mabhida Stadium ngo-5.30 ntambama.
Emdlalweni wokuqala adlale ngokulingana neRoyal AM ekuhambeni eMgungundlovu.
ISuperSport yona idlale umdlalo wayo wokuqala ekhaya, yanqoba kalula kwiRichard Bay ngo 2-0.
Indlela edlale ngayo iSuperSport ikhombisile ukuthi beyingahambisi usuku uma ithi ifuna ukufakela iMamelodi Sundowns inselelo ngesicoco seligi.
FUNDA NALA: Ukhiphe ubuchule uJohn Maduka ebona iPirates imshisa nendlu
Yingakho umdlalo wayo noSuthu kulindeleke ukuthi ube sezingeni eliphezulu ngoba nalo leli laseThekwini kufanele lidlale kahle ekhaya.
