IPirates yethula ezintsha ngoLorch, Timm, Kimvuidi noKapinga

I-Orlando Pirates isikhiphe umbiko ocacisa ngabadlali bayo abalimele futhi abazobe bengekho uma seyidlala kwiMTN8 e-Orlando Stadium ngoMgqibelo.

Iphinde yacacisa nabebesanda kufika eqenjini futhi abebengakadlali ababhekwe ngabomvu ngabalandeli.

Leli qembu likaJose Riveiro elibhekwe ngabomvu kule sizini lizogadulisana neSekhukhune United kulo mdlalo wangoMgqibelo.

Zigcina ukuqhuthana lezi zinkunzi kwaphumelela i-Orlando Pirates, iqukula indebe yNedbank Cup ngoMeyi.

Esitatimendeni esikhishwe ngoLwesihlanu, iPirates iveze ukuthi uMiguel Timm, Thembinkosi Lorch noKatlego Otladisa basalimale.

Bobabili oTimm noLorch abakadlali kule sizini njengoba besalashwa ukulimala abakuthole ngesizini edlule.

U-Otladisa yena useke wadlala njengoba angena esiwombeni sesibili bedlala neStellenbosch FC emdlalweni wokuqala kule sizini.

Isikhala sikaLorch nesikaTimm siyabonakala kuleli qembu yize lisadlale kahle kuyo yomibili imidlalo yalo kule sizini.

Indawo kaTimm ithathwe uNdabayithethwa Ndlondlo odlale ibhola elinenkosi phakathi bebhekene neRoyal AM waze waqokwa njengomdlali obevelele.

EkaLorch ithathwe ngumdlali omusha kwiBucs uPatrick Maswanganyi naye ongene khaxa ebholeni likaJose Riveiro.

Nokho kulapho ke lo mdlali othengwe kwiMarumo Gallants alimala khona njengoba esazohlala isikhashana engadlali.

Kodwa ke ngokusho kwe-Orlando Pirates bobathathu laba badlali kungenzeka babuyele eziziqeqesheni neqembu ngokugcwele ngeviki elizayo.

Lezi zinkunzi zaseSoweto ziphinde zaveza ukuthi abadlali abasanda kujoyina, oLesedi Kapinga noKarim Kimvuidi sebekulungele ukudlala.

UKimvuidi usayinwe ngeviki elidlule esuka kwiMaritzburg United. UKapinga yena ufike kwi-Orlando Pirates emavikini amabili edlule.